އުޒުބަކިސްތާން

އުޒްބަލިސްތާން ޓީމުގެ އެންމެ މަޝްހޫރު ކުޅުންތެރިއަކީ ކެޕްޓަން އަދި ފޯވަޑް އެލްޑޯ އަޒްމަޓޯ ޝޮމްރްދޯވް އެވެ. އުމުރުން މިހާރު 30 އަހަރުގެ ފޯވަޑް ވަނީ ގައުމީ ޓީމަށް މިހާތަނަށް 90 މެޗުން 44 ގޯލު ޖަހައިދީފަ އެވެ. އޭނާ މިވަގުތު ކުޅެނީ އިޓަލީގެ ރޯމާއިން ލޯނު އުސޫލުން ދޫކޮށްލުމުން ތުރުކީ ލީގުގަ އެވެ.

އުޒުބަކިސްތާނުގެ ގިނަ ކުޅުންތެރިން ކުޅެނީ އަމިއްލަ ގައުމުގަ އެވެ. ގައުމުން ބޭރުގައި ކުޅޭ ކުޅުންތެރިން ތެރެއިން މެންޗެސްޓާ ސިޓީގެ އަބްދުކޯދިރް ހުސަނޯވް އަކީ ޓީމުގެ އެންމެ އިތުބާރު ޑިފެންޑަރެވެ. އޭނާ ވަނީ މިހާތަނަށް ގައުމީ ޓީމަށް 25 މެޗު ކުޅެދީފަ އެވެ. އިރާނުގެ އިސްތިގްލާލް އަށް ކުޅޭ ރުސްޓަމް އަޝުރްމަޓޯވް އަކީ ގައުމީ ޓީމަށް 47 މެޗު ކުޅެދީފައިވާ ތަޖުރިބާކާރެކެވެ. މީގެ އިތުރުން އީރާނުގެ ޕާސޭޕޮލިސް އަށް ކުޅޭ ތަޖުރިބާކާރު ފޯވަޑް އިގޯ ސާގީވް ވަނީ ގައުމީ ޓީމަށް 81 މެޗުން 24 ގޯލު ޖަހައިފަ އެވެ. އިރާގުގެ އެރްބިލް އަށް ކުޅޭ ޝެރްޒޯދް ޓެމިރޯވް އަކީ ވެސް އަރަމުން އަންނަ ކުޅުންތެރިއެކެވެ.

ކޯޗު ކަނަވާރޯ އަށް ޖެހިފައިވާ އެންމެ ބުރަ މަސައްކަތަކީ ޓީމުގެ ޑިފެންސިވް ޑިސިޕްލިން ވަރުގަދަ ކުރުމެވެ. އޭނާގެ އިޓާލިއަން ސްޓައިލަށް ޓީމު ހާނުވަން ފަހަތް ވަރުގަދަކޮށް، ދިފާއުގައި ބޯޅަ ނެތީސް ތިބޭއިރު ކުޅުންތެރިންގެ ކޮންސަންޓްރޭޝަން ދަށްވުމަކީ ވަރަށް ގިނަ މެޗުތަކުގައި ފެނިފައިވާ މަންޒަރެކެވެ. މިކަންކަން ބަދަލު ކުރަން އޭނާ މަސައްކަތް ކުރިއިރު ކުރިމަތިވި އަނެއް މައްސަލައަކީ ގިނަ ކުޅުންތެރިންގެ ފިޓްނަސް ދަށްވުމެވެ. ހާއްސަކޮށް އީރާނުގެ ކުލަބުތަކަށް ކުޅޭ ކުޅުންތެރިން ނުކުޅެ ގިނަ ދުވަހު ތިބެން ޖެހުމެވެ.

ކޯޗު: ފަބިއޯ ކަނަވާރޯ

އުމުރު: 52

ގައުމު: އިޓަލީ

އުޒުބަކިސްތާނުގެ ކޯޗަކީ ދުނިޔެ އަށް މަޝްހޫރު ޑިފެންޑަރު ފަބިއޯ ކަނަވާރޯ އެވެ. އޭނާ ކޯޗުކަމާ ހަވާލުވީ އުޒުބަކިސްތާން ވޯލްޑް ކަޕަށް ކޮލިފައިވި ފަހުން މިދިޔަ ޑިސެމްބަރު މަހު އެވެ. ކަނަވާރޯ އަކީ 2006 ވަނަ އަހަރުގެ ވޯލްޑް ކަޕް އިޓަލީ އަށް ކާމިޔާބު ކޮށްދިން ކެޕްޓަނެވެ. އިޓަލީ ވޯލްޑްކަޕުގައި ނެތްތަން ފަޅުފިލުވައިދޭނެ މަދު މީހުންގެ ތެރެއިން އެކަކީ ކުރިން ރެއާލް މެޑްރިޑަށް ކުޅެ ދުނިޔޭގެ މޮޅު ކުޅުންތެރިޔާގެ މަގާމު ވެސް ހޯދާފައިވާ އިތުބާރު ދިފާއީ ކުޅުންތެރިޔާ އެވެ.

ކަނަވާރޯ ކޯޗުކޮށްދޭން ފެށީ 2014 ވަނަ އަހަރު ޗައިނާގެ ކުލަބު ގުއަންގްޒޫ އިންނެވެ. އޭގެ ފަހުން ސައޫދީ އަރަބިއާގެ އައް ނަސްރާއި ކްރޮއޭޝިޔާގެ ޑީނަމޯ ޒަގްރެބާއި އިޓަލީގެ އުދިނޭޒީ އަށް ވެސް ކޯޗުކޮށްދިނެވެ. އުޒްބަކިސްތާނަކީ އޭނާ ކޯޗުކޮށްދޭ ދެ ވަނަ ގައުމީ ޓީމެވެ. މީގެ ކުރިން ކޯޗުކޮށްދިނީ 2019 ވަނަ އަހަރު ޗައިނާ އަށެވެ.

ކަނަވާރޯގެ ކޯޗުކަމުގައި މިހާތަނަށް ކުޅުނު ހަތް މެޗުގެ ތެރެއިން ތިން މެޗުން މޮޅުވެ ތިން މެޗު ވަނީ އެއްވަރުވެފަ އެވެ. ކޯޗެއްގެ ގޮތުގައި އޭނާ އަށް މިހާތަނަށް ލިބުނު ކާމިޔާބީ އަކީ ޗައިނާގެ ސުޕަލީގާއި އެ ގައުމުގެ އެފްއޭކަޕް ކާމިޔާބު ކުރުމެވެ.

ޔޫރަޕާއި އެފްރިކާގެ ޓީމުތަކާ ކުޅޭއިރު ފިޒިކަލީ ފިޓްނޫން ނަމަ އެކަންވާނީ ފޫނުބެއްދޭނެ ގެއްލުމަކަށް. އުޒިބަކިސްތާނުގެ ލީގުގެ އެންމެ ބޮޑު މައްސަލައަކީ އިންޓެންސިޓީ ދަށްވުން. މިކަންކަން އެއް ދުވަހުން ރަނގަޅެއް ނުކުރެވޭނެ. އަހަރުމެން ވޯލްޑް ކަޕަށް ކޮލިފައިވުމަކީ ވަރަށް ބޮޑު އުފަލެއް. އެކަމަކު މުބާރާތަށް ފުރިހަމަ އަށް ތައްޔާރުވެގެން ދިއުމަކީ މުހިންމު ކަމެއް. މިވަގުތު އެންމެ ބޮޑު ކަންބޮޑުވުމަކީ ކުޅުންތެރިންގެ ފިޓްނަސް.