ކޮލޮމްބިއާ

ޓީމުގެ އެންމެ މަޝްހޫރު ކުޅުންތެރިއަކީ 2014 ވަނަ އަހަރުގެ ވޯލްޑް ކަޕުގެ ރަންބޫޓު ހާސިލް ކުރި ހާމޭސް ރޮޑްރިގޭޒެވެ. އެ މުބާރާތަށް ފަހު ސްޕޭނުގެ ރެއާލް މެޑްރިޑުން އޭނާގެ ސޮއި ހޯދި ނަމަވެސް ހާމޭސް ވެގެންދިޔައީ ސައިބޯނި ބޮތްކަކަށެވެ. ގައުމީ ޓީމަށް 124 މެޗުން 31 ގޯލު ޖަހާދީފައިވާ ކުޅުންތެރިޔާ މިހާރު ކުޅެނީ އެމެރިކާގެ މިނެސޮޓާގަ އެވެ. މިއީ ހަ އަހަރު ތެރޭގައި އޭނާގެ ހަތް ވަނަ ކުލަބެވެ.

ވައިސް ކެޕްޓަން ޑޭވިޑް އޮސްޕިނާ އަކީ ތަޖުރިބާކާރު ކީޕަރެކެވެ. ގައުމީ ޓީމަށް 129 މެޗު ކުޅެދީފައިވާ ކީޕަރު މިހާރު ކުޅެނީ ކޮލަމްބިއާގެ އެތްލެޓިކޯ އަށެވެ. އިނގިރޭސި ކުލަބު ކްރިސްޓަލް ޕެލަސްގެ ޑެނިއަލް މުނޯޒް އާއި ޔުވެންޓަސްގެ ހުއާން ކާބެލް އާއި ގަކަޓަސަރާއީގެ ޑެވިންސަން ސަންޗޭޒަކީ ފަހަތުގެ މުހިންމު ކުޅުންތެރިންނެވެ.

މެދުތެރެއިން ރިވަޕްލޭޓުގެ ކެވިން ކަސްޓާނޯ އާއި އެންމެ ކުރިން ބަޔާން މިއުނިކްގެ ފޯވަޑް ލުއިސް ޑިއާޒަކީ ވަރަށް މުހިންމު ދެ ކުޅުންތެރިންނެވެ. ހާއްސަކޮށް ޑިއާޒް ފޯމުގައި ހުރެފިނަމަ އެޓޭކް ވަރުގަދަ ވާނެ އެވެ.

ކޮލަމްބިއާގެ ޓީމުގެ ހިތުވިންދަނީ އަދިވެސް ހާމޭސް ރޮޑްރިގޭޒް އެވެ. ދިފާއީ ކުޅުމެއް ޓީމު ކުޅޭއިރު ކޮލިފައިންގައި އެކަނި ވެސް އޭނާ ހަތް ބޯޅަ ގޯލު ޖަހަން ދިނެވެ. އެކަމަކު އޭނާގެ ގޯލު ޖެހުމުގެ ރޭޓް ވަނީ ވަރަށް ބޮޑަށް ދަށްވެފަ އެވެ. ކޮލަމްބިއާގެ ދިފާއު ބަލިކަށްޓެވެ. ޓީމުގެ ވަރުގަދަކަން ފެނިގެންދަނީ ވަކިވަކި ކުޅުންތެރިންގެ ފަރާތުންނެވެ. ހާއްސަކޮށް ލުއިޒް ޑިއާޒްފަދަ ހަލުވި ކުޅުންތެރިންނަށް ބޯޅަ ލިބުމުންނެވެ.

ކޯޗު: ނެސްޓާ ލޮރެންޒޯ

އުމުރު: 60

ގައުމު: އާޖެންޓީނާ

ކޮލޮމްބިއާގެ ކޯޗަކީ ނެސްޓާ ލޮރެންޒޯ އެވެ. އާޖެންޓީނާގެ 60 އަހަރުގެ ކޯޗު ގައުމީ ޓީމާ ހަވާލުވީ 2022 ވަނަ އަހަރު އެވެ. އޭނާ ވަނީ މީގެ ކުރިން ވެސް ކޮލަމްބިއާ އާއި އާޖެންޓީނާގެ ގައުމީ ޓީމުގައި އެސިސްޓެންޓް ކޯޗަކަށް މަސައްކަތް ކޮށްފަ އެވެ. އޭނާގެ ކޯޗުކަމުގައި މިހާތަނަށް ކުޅުނު 44 މެޗުގެ ތެރެއިން ބަލިވީ އެންމެ ހަތް މެޗުންނެވެ. މޮޅުވީ 26 މެޗުންނެވެ. އެންމެ ހާއްސަ ކާމިޔާބީ އަކީ 2024 ވަނަ އަހަރުގެ ކޮޕާ އެމެރިކާގެ ފައިނަލަށް ކޮލޮމްބިއާ ގެންގޮސްދިނުމެވެ.

އަހަރުމެން ޓީމުގައި ދުނިޔޭގެ ފެންވަރުގެ ދެ ކުޅުންތެރިން އެބަތިބި. އެއީ ހާމޭސް އާއި ލުއިޒް ޑިއާޒް. މި ދެ ކުޅުންތެރިން ބަރޯސާ ނުވެ މުޅި ޓީމު ބެލެންސްކޮށް ކުޅުމަކީ ވަރަށް މުހިންމު ކަމެއް. ޓީމުގެ ދިފާއުގައި ރަނގަޅު ކުރަންޖެހޭ ކަންކަން އެބަހުރި. އަދި އެމެރިކާގެ ހޫނުގައި ކުޅެން ޓީމު ފަރިތަވެސް ވާން ޖެހޭ. އޭރުން މުހިންމު މެޗުތަކުގައި އެ މައްސަލަތަކާ ކުރިމަތިލާން އެނގޭނީ.