ސްވިޑްން

ސްވިޑްންގެ ގިނަ ކުޅުންތެރިން ކުޅެނީ ގައުމުން ބޭރުގަ އެވެ. އެސްޓަން ވިލާގެ ވިކްޓަރ ލިންޑްލޯފަކީ ޓީމުގެ އެންމެ އިތުބާރު އެއް ކުޅުންތެރިޔާ އަދި ކެޕްޓަނެވެ. ބޮރޫޝިޔާ ޑޯޓްމުންޑްގެ ޑެނިއަލް ސްވެންސަން އަކީ މުހިންމު ޑިފެންޑަރެކެވެ. އަދި ޖަރުމަނުގެ ވުލްފުސްބާގްގެ މަތިއަސް ސްވެންބާގް އާއި ނިއުކާސަލްގެ ފޯވަޑް އެންތޮނީ އެލަންގާ އަކީ މުހިންމު ކުޅުންތެރިއެކެވެ. ނަމަވެސް ޓީމުގެ އެންމެ މުހިންމު ދެ ކުޅުންތެރިންނަކީ އާސެނަލްގެ ފޯވަޑް ވިކްޓަ ޔޯކެރެސް އާއި ލިވަޕޫލްގެ އެލެގްޒެންޑާ އިސާކެވެ. މި ދެ ކުޅުންތެރިން އެކުވުމުން އެޓޭކް ކިތަންމެ ވަރުގަދަވިޔަސް ސްވިޑްގެ މެދާއި ފަހަތުގައި މައްސަލަ އުޅޭ ކަމަށް ކޯޗު ވެސް އެއްބަސްވެ އެވެ.

ވޯލްޑް ކަޕަށް ނުކުންނައިރު ސްވިޑްންއާ މެދު އޮތް އެންމެ ބޮޑު ސުވާލަކީ ޓީމުގެ އެންމެ މުހިންމު ދެ ފޯވަޑުން އެކުގައި ކުޅުވާނެތޯ އެވެ؟. އެލެގްޒެންޑާ އިސާކް ނުލައި ކޮލިފައިން މެޗުތައް ކުޅުވި ފޯމޭޝަނާއި މުޅި ޓީމުގެ ރޭވުން އޭނާ އެނބުރި އައުމުން ބަދަލު ކުރަން ޖެހޭނެ އެވެ. ސްވިޑްންގެ ކޯޗުކަމާ ޕޮޓާ ހަވާލުވުމަށްފަހު އޭނާ އިސްކަންދެނީ ފަހަތަށް ތިން ޑިފެންޑަރުން ލައިގެން ކުޅުވުމަށެވެ. ސަބަބަކީ މެދުތެރޭގެ ސަޕޯޓް ފަހަތާއި ކުރިއަށް އެއްވަރަކަށް ހޯދައިދޭން ބޭނުންވާތީ އެވެ.

ކޯޗު: ގްރެހަމް ޕޮޓާ

އުމުރު: 50

ގައުމު:  އިންގްލޭންޑް

ސްވިޑްންގެ ކޯޗަކީ އިނގިރޭސިއެކެވެ. ގްރެހަމް ޕޮޓާ އެވެ. އުމުރުން 50 އަހަރުގެ ޕޮޓާ ވަނީ ގައުމީ ޓީމާ ހަވާލުވުމުގެ ކުރިން ޗެލްސީ އާއި ވެސްޓްހަމް އަދި ސްވަންސީ އާއި ބްރައިޓަން އަށް ވެސް ކޯޗުކޮށްދީފަ އެވެ. މިއީ ގައުމީ ޓީމަކަށް އޭނާ ކޯޗުކޮށްދޭ ފުރަތަމަ ފަހަރެވެ. އޭނާ ކޯޗު ކަމާ ހަވާލުވީ 2025 ވަނަ އަހަރުގެ ފަހުކޮޅު އެވެ. އިނގިރޭސި މީޑިއާގެ ޕްރެޝަރާ ވެސް އެކު ކުލަބުތަކުގައި ގާއިމްވެ ނުހުރެވުނަސް ޕޮޓާ ވަނީ ސްވިޑްންގެ ގައުމީ ޓީމާ ހަވާލުވުމަށްފަހު މިވީ ކުޑަ ދުވަސްކޮޅެއްގެ ތެރޭގައި ޓީމަށް ބަދަކުތަކެއް ގެނެސްފަ އެވެ. ކޯޗިންގައި އޭނާ ގެންގުޅެނީ ސްޕޭނުގެ ކޯޗުންގެ އުސޫލުތަކެވެ. ހާއްސަކޮށް ބެލްޖިއަމްގެ ކޯޗު ރޮބާޓޯ މާޓިނޭޒާއި މެންޗެސްޓާ ސިޓީގެ ކޯޗު ޕެޕް ގާޑިއޯލާގެ އުސޫލުތައް އޭނާ ވަރަށް ބޮޑަށް ގަބޫލު ކުރެ އެވެ.

ވިކްޓަރ ޔޯކެރެސް އަކީ ހަމައެކަނި ގޯލު ޖަހާ ކުޅުންތެރިއެއް ނޫން. އޭނާ އަކީ ފަހަތަށް ފައިބައި ޑިފެންސް ވެސް ކޮށްދޭ ކުޅުންތެރިއެއް. އޭނާ ޓީމުގައި ހުރުމުން ލިބޭ އިތުބާރު އިސާކް އައުމުން ބޮޑުވާނެ. މި ދެ ކުޅުންތެރިން އެކުވުމުން އެޓޭކް ވަރުގަދަވާނެ. އަހަރެންނަށް ދެ ކުޅުންތެރިން އެކީގައި ބޭނުން ކުރަން ދައްޗެއް ނެތް.