ނެދަލޭންޑްސް

ނެދަލޭންޑްސްގައި މޮޅު ކުޅުންތެރިން ބައިވަރެވެ. ޓީމުގެ ކެޕްޓަނަކީ ލިވަޕޫލްގެ ކެޕްޓަން ވާޖިލް ވެންޑައިކެވެ. އޭނާ އަކީ އަބަދުވެސް ލީޑަރެކެވެ. ފަހަތުން ކުރިއަރައި ގޯލު ޖެހުމަށް ވެސް ކުޅަދާނަ ކުޅުންތެރިއެކެވެ. މެދުތެރެއިން ބާސެލޯނާގެ ފްރޭންކީ ޑިޔޮންގަކީ މިހާރު ޔޫރަޕުގައި ހުރި އެންމެ އިތުބާރު މިޑްފީލްޑަރެވެ. މެންޗެސްޓާ ސިޓީގެ ޓިއާނީ ރެއިންޑާސް އާއި ޔުވެންޓަސްގެ ޓެއުން ކޫޕްމެއިނާސް ތިބުމުން މެދުތެރެ އިތުރަށް ފުރިހަމަވާނެ އެވެ. ކުރިއަށް ބަލާއިރު ލިވަޕޫލްގެ ކޯޑީ ގަޕޯ އަކީ ބޮޑެތި މުބާރާތްތަކުގައި އަބަދުވެސް ފާހަގަ ކުރެވޭ ކުޅުންތެރިއެކެވެ. އެކަމަކު ނޭތަން އޭކް ފަދަ ކުޅުންތެރިންނަށް މި ސީޒަނުގައި ކުޅެން ލިބުނު ވަގުތު މަދުވުމަކީ ކޯޗުގެ ވަރަށް ބޮޑު ކަންބޮޑުވުމެކެވެ. ލިވަޕޫލްގެ ގެރެމީ ފްރިމްޕޮންގާއި އިންޓަމިލާނުގެ ޑެންޒެލް ޑަމްފްރައިސް އާއި ރޯމާގެ ޑޮންޔެލް މަލެން އަކީ ވެސް ފާހަގަ ކޮށްލެވޭ ކުޅުންތެރިއެކެވެ. ބްރެޒިލްގެ ޕަލްމެއިރާސް އަށް ކުޅޭ މެމްފިސް ޑެޕޭ އަކީ ކޯޗުގެ ފެވަރިޓެކެވެ.

ނެދަލޭންޑްސް ޓީމުގައި ތަރިން ގިނަ އެވެ. ތަޖުރިބާ ވެސް އެބަހުއްޓެވެ. ކޯޗު ކޫމަން އަކީ ކޮންމެ މެޗަކަށް ވެސް އިދިކޮޅު ޓީމަށް ބަލައިގެން ހިސާބު ޖަހާ ކޯޗެކެވެ. މިހެންވެ އޭނާގެ ފުރަތަމަ 11 އަބަދުވެސް ބަދަލުވެ އެވެ. ޓީމުގައި ކިރިޔާ ވެސް ބަލި ފަޔަކަށް ފާހަގަ ކުރެވެނީ ގޯލް ކީޕަރުންނަށް ހެދޭ މިސްޓޭކްތަކެވެ. ޒަވީ ސިމޮންސް އަށް ވޯލްޑް ކަޕް ނުކުޅެވުމަކީ އެޓޭކިން މިޑްފީލްޑްގައި ޖަސްޓިން ކްލައިވެޓް ފަދަ ޒުވާން ކުޅުންތެރިންނަށް ހުޅުވުނު ދޮރެކެވެ. ނެދަލޭންޑްސް ކޮންމެ ފާޑަކަށް ކުޅުނަސް ގިނައިން ޓީމު މޮޅުކޮށްދެނީ ބެންޗުން އަރާ ކުޅުންތެރިންނެވެ. މިހެންވެ ކޫމަންގެ ހިސާބުތައް ގޯސް ނޫން ކަމަށް ބެލެވެން ފުރުސަތު އެބައޮތެވެ.

ކޯޗު: ރޮނަލްޑް ކޫމަން:

އުމުރު: 63

ގައުމު: ނެދަލޭންޑްސް

ރޮނަލްޑް ކޫމަން އަކީ ތަޖުރިބާކާރެކެވެ. މިއީ އޭނާ ގައުމީ ޓީމަށް ކޯޗުކޮށްދޭ ދެ ވަނަ ފަހެރެވެ. އުމުރުން 63 އަހަރުގެ ކޯޗަކީ ނެދަލޭންޑްސްގެ ގައުމީ ޓީމަށް 78 މެޗުން 14 ގޯލު ޖެހި ކުޅުންތެރިއެކެވެ. އޭނާ އެންމެ ފާހަގަ ކުރެވެނީ ބާސެލޯނާ އަށް އެންމެ ފުރަތަމަ ޗެމްޕިއަންސް ލީގު ކާމިޔާބުކޮށްދިން ކުޅުންތެރިޔާގެ ގޮތުގަ އެވެ. އަލުން ގައުމީ ޓީމާ ހަވާލުވުމަށްފަހު އޭނާ ވަނީ ޒުވާން ކުޅުންތެރިންނާއި ތަޖުރިބާކާރު ކުޅުންތެރިން ހިމަނައިގެން ކުރިއަށްވުރެ ފުރިހަމަ ޓީމެއް ބިނާކޮށްފަ އެވެ. އެކަމަކު މި ޓީމު ބޮޑު މުބާރާތެއްގައި ވާދަކުރާނީ ކޮން ފެންވަރެއްގައި ކަމާމެދު އޮތް ސުވާލަށް ނިމުން އަންނާނީ ފައިނަލްގައި ކުޅެގެންނެވެ.

ސްވިޑްން އަކީ ޔޫރަޕުގައި ވެސް ކުރިއަރަމުން އަންނަ ގަދަ ޓީމެއް. ޖަޕާނަކީ ވަރަށް ޑިސިޕްލިން ޓީމެއް. ވަރަސް ހިތްވަރު ގަދަ ޓީމެއް. އެފްރިކާގެ ގައުމުތައް މި ފަހުން ފުޓްބޯޅަ ބަދަލުކޮށްފި. އެހެންވީމާ ޓިއުނީޝިޔާ ވަރުގަދަ ވާނެ. މި ގްރޫޕުގައި އެއްވެސް މެޗެއް ފަސޭހަކޮށްގެން ފަރަކު ނުޖެހޭނެ. ބައެއް ގައުމުތައް ފަދައިން ކުޅުންތެރިންގެ މާބޮޑު ޕޫލެއް ނެތަސް އަހަރުމެންގެ އަމާޒަކީ މުބާރާތް ކާމިޔާބު ކުރުން.