ސެނަގާލް

ސެނަގާލްގެ އެންމެ އަލިގަދަ ތަރިއަކީ ފޯވަޑް ސާދިއޯ މާނޭ އެވެ. އޭނާ އަކީ އެފްރިކާގެ އެންމެ އަގުބޮޑު ކުޅުންތެރިޔާ އެވެ. ސައުތެމްޓަނުން ލިވަޕޫލަށް އޭނާ ގަތީ 34 މިލިއަން ޕައުންޑަށެވެ. އޭނާ އަކީ އިނގިރޭސި ޕްރެމިއާ ލީގުގައި އެންމެ އަވަސް ހެޓްރިކް ހެދި ކުޅުންތެރިޔާ ވެސްމެ އެވެ. އެއީ އެސްޓަން ވިލާ އަތުން ސައުތެމްޓަން 2015 ވަނަ އަހަރު 6-1އިން މޮޅުވި މެޗުގައި އެންމެ 176 ސިކުންތް ތެރޭގައި ގޯލް ޖަހައިގެންނެވެ. މާނޭ އަކީ މުސްލިމެކެވެ. ކޮންމެ މެޗެއް ފެށުމުގެ ކުރިން ﷲގެ ހަޒްރަތަށް ދުއާ ދެންނެވުމަކީ އޭނާގެ އާދައެކެވެ. އަދި ލަނޑު ޖަހާފައި ސަޖިދަ ކުރުމަކީ ވެސް އޭނާގެ ފުށުން ފެންނަ އިސްލާމީ ރިވެތި އާދައެކެވެ. މާނޭ އަކީ ކުރީގައި ބޯޅަ ހިފަހައްޓައިގެން ކުޅެ، އެހެން ކުޅުންތެރިންނަށް ފުރުސަތު ފަހިކޮށްދީ ގޯލާ ވެސް ރައްޓެހި ކުޅުންތެރިއެކެވެ. ލިވަޕޫލަށް އޭނާ ގެނައިއިރު ބައެއް މީހުން އެއީ ކާކުތޯ ސުވާލު ކުރުމުން ކޯޗު ޔާގެން ކްލޮޕް ބުނީ މަދުވެގެން އެއް ސީޒަން ތެރޭގައި މާނޭ އަށް އެންމެން ތައުރީފް ކުރަން ފަށާނެ ކަމަށެވެ. ބައެއް މީހުންގެ ނަޒަރުގައި އޭނާ އަކީ އެފްރިކާގެ މުޅި ތާރީހުގައި ވެސް ފެނިގެންދިޔަ އެންމެ މޮޅު އެއް ކުޅުންތެރިޔާ އެވެ. ސައޫދީ އަރަބިއާގެ އައް ނަސްރަށް ކުޅޭ ކުޅުންތެރިޔާ ވަނީ ލިވަޕޫލްގައި ޗެމްޕިއަންސް ލީގާއި އިނގިރޭސި ޕްރެމިއާ ލީގު ވެސް ކާމިޔާބު ކޮށްދިނެވެ. އެންމެ ފަހުގެ އެފްރިކާ ކަޕް ސެނަގާލް ކާމިޔާބު ކުރުމުގައި ވެސް އޭނާގެ ހިއްސާ ބޮޑެވެ.

އިދްރީސާ ގުޔޭ އަކީ ގައުމީ ޓީމަށް އެންމެ ގިނަ މެޗު ކުޅެދިން ކުޅުންތެރިޔާ އެވެ. އެވަޓަން އާއި ޕީއެސްޖީގައި މޮޅަށް ކުޅުނު މީޑްފީލްޑަރަކީ އެފްރިކާ ކަޕް ހޯދި ޓީމުގެ މުހިންމު ތަނބެކެވެ. ޑިފެންޑަރު ހާލިދޫ ކުލިބާލޭ އަކީ އެކަތައިގެ ޑިފެންޑަރެވެ. އޭނާ އަކީ މިވަގުތު ޓީމުގެ ކެޕްޓަނެވެ. އަނިޔާގައި ހުއްޓަސް އޭނާ ޓީމުގައި ހިމެނެނީ ތަޖުރިބާ އާއި ލީޑަރޝިޕް ވަރުގަދަ ވުމުންނެވެ.

ސެނެގާލްގެ އެންމެ ވަރުގަދަ ޑިޕާޓްމަންޓަކީ ދެ އަރިމައްޗެވެ. އެ މީހުންގެ ހުނަރާއި ސްޕީޑެވެ. މެދުތެރެއިން ވަރުބަލި ވުމެއްނެތި ކުޅޭ މިޑްފީލްޑަރުންނެވެ. މި ކުޅުންތެރިންގެ މައިގަނޑު އުސޫލަކީ ބޯޅަ ލިބުމާއެކު އަވަހަށް އެޓޭކަށް ބަދަލުކޮށްލުމެވެ. އަރިމަތިން ކުޅޭ ހަލުވި ކުޅުންތެރިން ލައްވައި އިދިކޮޅު ޑިފެންސް ހާވާލުމެވެ. އެފްރިކާގެ ޗެމްޕިއަންކަން އެ މީހުން ހޯދީ މި އުކުޅުތައް ބޭނުންކޮށްގެންނެވެ. އެކަމަކު މި ފަހަރުގެ ވޯލްޑް ކަޕާ ކުރިމަތިލާއިރު އެންމެ ބޮޑު ކަންބޮޑުވުމަކީ ޑިފެންސް ލައިނުގެ މައްސަލަ އެވެ.

ކޯޗު: ޕާޕާ ތިއޯ:

އުމުރު: 45

ގައުމު:  ސެނެގާލް

ޕާޕާ ތިއޯ އަކީ ސެނަގާލަށް އެފްރިކާ ކަޕް ކާމިޔާބު ކޮށްދިން ކޯޗެވެ. އޭނާ އަކީ ކުރީގެ ފޯވަޑެކެވެ. ސްޕޭނާއި ފްރާންސްގައި ކުޅުނު ކުޅުންތެރިޔާ ވަނީ ގައުމީ ޓީމަށް 16 މެޗުން ފަސް ގޯލު ޖަހައިދީފަ އެވެ. އޭނާ ކޯޗުކަން ކުރަން ފެށީ 2018 ވަނަ އަހަރު އެވެ. ގައުމީ ޓީމާ ހަވާލުވީ 2022 ވަނަ އަހަރު އެވެ. އެނާގެ ކޯޗުކަމުގައި މިހާތަނަށް ކުޅުނު 23 މެޗުގެ ތެރެއިން 18 މެޗުން މޮޅުވެ ބަލިވީ ދެ މެޗުންނެވެ.

އަހަރެންގެ އަމާޒަކީ ވޯލްޑް ކަޕް ކާމިޔާބު ކޮށްފައި ގައުމީ ޓީމާ ވަކިވުން. އެކަން ނުކުރެވެންވީ ސަބަބެއް ނެތް. ފްރާންސަކީ އަހަރުމެން ދަންނަ ގައުމެއް. 2002ގައި އަހަރުމެން އެ މީހުންނާ ދެކޮޅަށް މޮޅަށް ކުޅުނިން. މި ފަހަރު ވެސް އެކަން ކުރެވިދާނެ. ނޯވޭ އާއި އިރާގަކީ ވެސް ވަރުގަދަ ދެ ގައުމު. އެހެންވީމާ މި ގްރޫޕް ފަސޭހަވާނެ ކަމަކަށް ނުބަލަން.