ފްރާންސް

ފްރާންސްގެ އެންމެ މޮޅު ކުޅުންތެރިއަކީ ފޯވަޑް އަދި ކެޕްޓަން ކީލިއަން އެމްބާޕޭ އެވެ. މި ފަހަރުގެ މުބާރާތާ އޭނާ ކުރިމަތިލާއިރު ސުވާލު އުފެދެނީ އޭނާގެ ފިޓްނަސްއާ މެދުގަ އެވެ. ރެއާލް މެޑްރިޑަށް ބަދަލުވެ ހުސްވި ދެ ސީޒަނުގައި ވެސް ގިނަ ގޯލުތަކެއް ޖެހި ނަމަވެސް ސީޒަނުގެ އެންމެ މުހިންމު ވަގުތުތަކުގައި އޭނާ އަށް ދިމާވި މައްސަލަ އަކީ ކަކުލަށް ތަދުވުމުގެ މައްސަލަ އެވެ. އަދި ސީޒަން ނިމެނިކޮށް ޓީމުގެ ބައެއް ކުޅުންތެރިންނާއި އޮފިޝަލުންނާ ވެސް މައްސަލަ ޖެހިފައިވާ ކަމަށް ވާހަކަ ދެކެވެ އެވެ.

އެމްބާޕޭ ފިޓްކޮށް ހުރެފިނަމަ އެއީ އެކަތައިގެ ކުޅުންތެރިއެކެވެ. ވޯލްޑް ކަޕުގެ ފައިނަލުގައި ފަހުގެ ތާރީހެއްގައި ހެޓްރިކެއް ހެދީ އޭނާ އެވެ. އަދި މި ފަހަރުގެ މުބާރާތުގައި ވޯލްޑް ކަޕްގެ އެންމެ ގިނަ ގޯލު ޖެހި ކުޅުންތެރިޔާގެ މަގާމަށް ވާސިލް ވުމުގެ ފުރުސަތު ވެސް އޭނާ އަށް އެބައޮތެވެ.

އެންމެ ފަހުގެ ވޯލްޑް ކަޕުގެ ރަންބޫޓު އޭގެ ކުރީ މުބާރާތުގައި އެންމެ މޮޅު ޒުވާން ކުޅުންތެރިޔާގެ މަގާމު ހޯދި ފޯވަޑް ވަނީ މިހާތަނަށް ގައުމީ ޓީމަށް 96 މެޗުން 56 ގޯލު ޖަހައިދީފަ އެވެ.

ފްރާންސްގެ އެންމެ ވަރުގަދަ އަދި އޮގަނައިޒިން ޑިޕާޓްމަންޓަކީ ޑިފެންސް ލައިނެވެ. ފުލްބެކުތަކާއި ސެންޓްރަލް ޑިފެންސް ވަރުގަދަ އެވެ. ޓީމުގައި އެޓޭކިން ކުޅުންތެރިން ބައިވަރެވެ. ކޮންމެ ކުޅުންތެރިއަކީ ވެސް ދުނިޔޭގެ ފެންވަރުގެ ތަރިއެކެވެ. އެކަމަކު މި ފަހަރުގެ ވޯލްޑް ކަޕުގައި ފްރާންސްގެ މައްސަލައަކަށްވާނީ ވެސް މިއީ އެވެ. މި ކުޅުންތެރިން ތަރުތީބު ކުރާނެ ގޮތާއި ތަރުތީބުވެފައި ތިބޭނެ ގޮތަކީ ވަރަށް ބޮޑު ސުވާލެކެވެ. ކެޕްޓަން އެމްބާޕޭ އަށް ފްރީ ރޯލެއް ބޭނުންވާއިރު ގިނަ ބައެއްގެ ނަޒަރުގައި އޮލީވިއާ ޖީރޫޑް ކުޅުން ހުއްޓާލި ފަހުން ފްރާންސްގެ ސެންޓްރަލް ފޯވަޑެއްގެ މަގާމު ވަނީ ފޫނުބެއްދި އެވެ. މައިގަނޑު ސަބަބަކީ ޓީމުގައި ތިބި ގިނަ އެޓޭކަރުންނަކީ އަރިމަތިތަކުންނާއި މެދުން ކުރިއަރައި އެޓޭކްގައި ބައިވެރިވާ ކުޅުންތެރިން ކަމުގައިވުމެވެ. އިސް ފޯވަޑެއްނެތުމަކީ ފްރާންސްގެ އުނިކަމެކެވެ.

ކޯޗު: ޑިޑިއޭ ޑެޝޯން

އުމުރު: 57

ގައުމު: ފްރާންސް

ޑިޑިއޭ ޑެޝޯން އަކީ 1998ގެ ވޯލްޑްކަޕާއި 2000 ވަނަ އަހަރުގެ ޔޫރޯ ކާމިޔާބުކޮށްދިން ކެޕްޓަނެވެ. މިއީ ގައުމީ ކޯޗުކަމުގައި އޭނާގެ 14 ވަނަ އަހަރެވެ. ދެ ފަހަރު ވޯލްޑްކަޕް ފައިނަލް ކުޅެ 2018ގައި ތަށި ހޯދައިދީފި އެވެ. އޭނާގެ ކޯޗުކަމުގައި 100 އަށްވުރެ ގިނަ މެޗުން ޓީމު މޮޅުވެއްޖެ އެވެ. އޭނާގެ ކޯޗުކަމުގައި ބައިނަލް އަގްވާމީ ހަ މުބާރާތުގައި ކުޅެ އެއް ތައްޓާއި ދެ ރިހި މެޑަލް ހޯދުމުން މި ފަހަރުގެ ވޯލްޑް ކަޕުގައި އޭނާފަދަ ވިދުންގަދަ އެހެން ކޯޗަކު ނުފެންނާނެ އެވެ. ފްރާންސްގެ މާސޭގައި ކޯޗެއްގެ ގޮތުން އޭނާ ހެދިބޮޑުވަމުންދިޔަ ސްޕީޑް ރަނގަޅު ވަމުންދަނިކޮށް ޑެޝޯނަށް ގައުމީ ކޯޗުކަން ދިނީ ވަރަށް ނާޒުކު ވަގުތެއްގަ އެވެ. ގައުމީ ޓީމާ ހަވާލުވިއިރު ޓީމު އޮތީ ދުވަހަކު ބައިބައިނުވާ ވަރަށް ކަފިވެފަ އެވެ. ނަމަވެސް އޭނާ ވަނީ މޮޅަށް ކުޅުނަސް އަހުލާގު ރަނގަޅު ނޫން ކުޅުންތެރިން ޓީމުން ބާކީކޮށް، މުޅި ޓީމު ހަމަމަގަށް އަޅުވައިފަ އެވެ. ސާމިރު ނަސްރީ އާއި ކަރީމް ބެންޒެމާ ފަދަ ކުޅުންތެރިން މޮޅަށް ކުޅެކުޅެ ތިއްބައި ގައުމީ ޓީމުން ބާކީކޮށް ޒުވާން ޓީމަކާއެކު ފްރާންސް ހޯދި ކާމިޔާބީތަކުގެ ސަބަބުން މިފަހަރުގެ ވޯލްޑް ކަޕާމެދު އެ ގައުމުން ކުރާ އުއްމީދުތައް ވަރަށް މަތިވެރި އެވެ. ޑެޝޯން ވެސް ހުރީ ތައްޓާއެކު ގައުމީ ޓީމާ ވަކިވާން ބޭނުންވެފަ އެވެ.

ފްރާންސަކީ އެންމެ ވަރުގަދަ ޓީމޭ ބުނެ އަޑުގަދަ ކުރުމަކީ ބޭނުން ކަމެއް ނޫން. އަހަރުމެންގެ އަމާޒަކީ ހަރުފަތަކަށް ފަހު ހަރުފަތެއް ކުރިއަށް ދިއުން. މިއީ އަހަރެންގެ ފަހު ވޯލްޑް ކަޕަށް ވުމުން ކޮންމެހެން ބޮޑު ކާމިޔާބީއަކާއެކު ގައުމީ ޓީމުން ވަކިވާން ވެގެން އެކަން ކުރާކަށް ވެސް ނޫޅެން. އަހަރުމެން ޓީމުގެ ހުރި ފެންވަރަކާއެކު ކުރިއަށް ދިއުމުގެ ވިސްނުން ކުޅުންތެރިން ގެންގުޅުން އެންމެ މުހިންމު ކަމަކީ.