ދެކުނު އެފްރިކާ

ލީލް ފޯސްޓާއަކީ ޓީމުގެ ކުރި ހިފަހައްޓައިދޭ އެންމެ އިސް ކުޅުންތެރިޔާ އެވެ. ހާއްސަކޮށް ހަމަލާތައް އުފެއްދުމުގައި އޭނާގެ ވަރުގަދަ ކަމާއި ހަލުވިކަން ބޭނުން ކުރެ އެވެ. އެކަމަކު އޭނާ އަށް ބޯޅަ ފޯރުކޮށްދޭން ދެކުނު އެފްރިކާގެ އެހެން ކުޅުންތެރިން ހަރުދަނާ ދައުރެއް އަދާކޮށްދޭން ޖެހޭ ކަމަށް ތަޖުރިބާކާރުން ފާހަގަ ކުރެ އެވެ. އިނގިރޭސި ޕްރެމިއާ ލީގުގެ ބާންލޭ އަށް ކުޅޭ 25 އަހަރުގެ ފޯވަޑް ވަނީ ނިމިދިޔަ ސީޒަނުގައި 25 އަށްވުރެ ގިނަ ގޯލު ޖަހައިފަ އެވެ. އެންމެ ފަހުގެ އެފްރިކާ ކަޕުގައި އޭނާ ވަނީ ދެ ގޯލު ޖަހައި ދެ ގޯލެއް ޖަހަން މަގު ފަހިކޮށްދީފަ އެވެ.

ދެކުނު އެފްރިކާގެ އެންމެ ބޮޑު އެއް މައްސަލައަކީ ބޯޅައާއެކު ޖިސްމާނީ ވަރުގަދަކަން ނުދެއްކުމެވެ. އެކަމަކު އެއީ ހަލުވި ޓީމެކެވެ. ހާއްސަކޮށް ދެ އަރިމަތިން ކުޅޭ ކުޅުންތެރިންގެ ދުވެލި ބާރުވެފައި، ދުރުން ގޯލަށް ޖަހާ ބޯޅަތައް ނުރައްކަލެވެ. މީގެ އިތުރުން ފުލްބެކުން ކުރިއަރައި ހަމަލާތަކުގައި ބައިވެރިވުމަކީ ވެސް ގޭމްޕްލޭނުގެ މުހިންމު ބައެކެވެ. މި އުކުޅުގައި އެފްރިކާގެ ގިނަ ޓީމުތައް ވަނީ ދެކުނު އެފްރިކާގެ އަތްދަށުވެފަ އެވެ. ޓީމުގެ މައިބަދަ އަކީ ޓޮބޯހޯ މޮކޮއެނާ އެވެ. އޭނާގެ ކުރިން މެދުތެރެއިން ޓީމު ލައްވައި ކުޅުވައިދޭނެ ކުޅުންތެރިއަކު ހޯދުން ކޯޗު ބްރޫސް އަށްވީ ވަރަށް ދަތިކަމަކަށެވެ. މީގެ އިތުރުން 36 އަހަރުގެ މެމެލޯޑީ ސުންޑޯންސް އަކީ އެޓޭކް ކުރާއިރު މަތިން އަންނަ ބޯޅަތަކަށް ކުޅަދާނަ ކުޅުންތެރިއެކެވެ. އަދި އިދިކޮޅު ޓީމުތަކުގެ މެދުތެރެ ރޫޅާލަން ކޯޗު ބޭނުންކުރާ އެންމެ މުހިންމު އުކުޅަކީ ވެސް އޭނާގެ ތަޖުރިބާ އެވެ.

ކޯޗު: ހޫގޯ ބުރޫސް:

އުމުރު: 74

ގައުމު: ބެލްޖިއަމް

ހޫގޯ ބްރޫސް އަކީ 1986 ވަނަ އަހަރު މެކްސިކޯގައި އޮތް ވޯލްޑް ކަޕުގައި ކުޅުނު ބެލްޖިއަމް ޓީމުގެ ޑިފެންޑަރެކެވެ. މިހެންވެ އަލުން މެކްސިކޯ އަށް ދެވޭތީއާއެކު މިފަހަރުގެ މުބާރާތަކީ ކުރީގެ ހަނދާންތަކާއެކު އޭނާ އަށް އަނެއްކާ ވެސް ހާއްސަ މުބާރާތެކެވެ. ދެކުނު އެފްރިކާގެ ކޯޗުކަމާ އޭނާ ހަވާލުވީ 2017 ވަނަ އަހަރުގެ އެފްރިކާ ކަޕް ކެމަރޫނަށް ކާމިޔާބު ކޮށްދީފަ އެވެ. މިހާރު އޭނާ އަށްވުރެ ގިނަ ދުވަހު ދެކުނު އެފްރިކާގެ ކޯޗުކަމުގައި ހުރި އެހެން މީހަކު ނެތެވެ. އޭނާ ވަނީ ބެލްޖިއަމާއި ތުރުކީ އާއި އަލްޖީރިއާގެ ގިނަ ކުލަބުތަކަށް ވެސް ކޯޗުކޮށްދީފަ އެވެ. މަގާމާ ހަވާލުވި ފަހުން ހޯދުނު އެންމެ ބޮޑު ކުރިއެރުމަކީ 26 އަހަރު ފަހުން ދެކުނު އެފްރިކާ ވޯލްޑް ކަޕަށް ކޮލިފައި ކޮށްދެވުމެވެ. މި މުބާރާތަށް ފަހު އޭނާ ނިންމައިގެން އެ ހުރީ ރިޓަޔާ ކުރުމަށެވެ.

މުބާރާތް ހުޅުވާ މެޗުގައި މުބާރާތް ބާއްވާ ގައުމާ ދެކޮޅަށް ކުޅުމަކީ ވަރަށް އުނދަގޫ ކަމެއް. އަދި ވަރަށް ހާއްސަ ކަމެއް. އަހަރުމެން ކުޅޭނީ މޮޅުވާން. އެކަމަކު މި ގްރޫޕުން އަހަރުމެން ދެ ވަނަ ބުރަށް ނުދިޔަޔަސް އެކަމާ އެއްވެސް މީހަކު ޝަކުވާ ކުރާނެ ކަމަކަށް ނުފެނޭ. އެކަމަކު ފުރަތަމަ މެޗުގެ ނަތީޖާ ރަނގަޅު ވެއްޖެނަމަ ދެން ކަންތައްވާނެ ގޮތް ބަލަން ތިބުމަކީ ޝައުގުވެރި ކަމަކަށްވާނެ.