މެކްސިކޯ

ރައުލް ހިމެނޭޒަކީ މި ޓީމުގެ އެންމެ ތަޖުރިބާކާރު އެއް ކުޅުންތެރިޔާ އެވެ. 2025 ވަނަ އަހަރު މެކްސިކޯއިން ޖެހި 22 ގޯލުގެ ތެރެއިން ނުވަ ގޯލު ޖެހީ އޭނާ އެވެ. ފުލަމްގައި މި ސީޒަނުގައި މޮޅަށް ކުޅެ އޭނާ ޖެހި ގޯލުތަކާއެކު ވޯލްޑް ކަޕް ޓީމު ލީޑް ކުރާނީ ވެސް އޭނާ އެވެ. ފެނަބާޗޭގެ އެޑްސަން އަލްވަރާޒަށް އޮންނާނީ ޑިފެންސްލައިނުގެ ކުރިމަތިން ޓީމު ހަމަޔަކަށް އަޅުވައިދިނުމެވެ. އޭސީ މިލާނުގެ ފޯވަޑް ސެންތިއާގޯ ޖިމިނޭޒް އަކީ ފޯވަޑް ލައިނުގައި މުހިންމު ދައުރެއް އަދާކުރާނެ ކުޅުންތެރިއެކެވެ. އުމުރުން 40 އަހަރުގެ ގޯލްކީޕަރު ގުއިލާމޯ އޮޗާއޯ ރެކޯޑް އަދަދެއް ކަމަށްވާ ހަ ވަނަ މުބާރާތެއް ކުޅެން ތައްޔާރުވީ މެކްސިކޯގެ ގޯލު އިތުބާރާއެކު ފޫބައްދައިދޭނެ އެހެން މީހަކު ނެތިގެންނެވެ.

ކަމެއް ގޯސްވުމުން މެކްސިކޯ މީހުންނަށް އަގުއިރޭ ވަރެއް ނޯވެ އެވެ. ނަތީޖާއެއްގެ ގޮތުން މިއީ އަގުއިރޭ މެކްސިކޯ އަށް ކޯޗުކޮށްދޭ ތިން ވަނަ ފަހަރެވެ. އުމުރުން 66 އަހަރުގެ ކޯޗު ވަނީ 2002 ވަނަ އަހަރުގެ އޭނާގެ ކޯޗުކަމުގައި މެކްސިކޯ ގަދަ 16އިން ބަލިވީ ވާދަވެރި އެމެރިކާ އަތުންނެވެ. އޭގެ ފަހުން 2010ގައި މެކްސިކޯ ކެޓީ އާޖެންޓީނާ އަތުން ބަލިވެގެންނެވެ. އޭނާ އަކީ މެކްސިކޯގެ ތާރީހުގައި މިހާތަނަށް ދެ ފަހަރު ގޯލްޑްކަޕް ކާމިޔާބު ކޮށްދިން ހަމައެކަނި ކޯޗެވެ. އަދި މެކްސިކޯ ގޮވައިގެން އެންމެ ގިނަ މެޗުން މޮޅުވި ކޯޗަކީ ވެސް އޭނާ އެވެ.

އަގުއިރޭ އާއްމުކޮށް ކުޅުވަނީ 4-3-3 ފޯމޭޝަނަށެވެ. އެކަމަކު ޓީމުގެ ކުރީގައި ފަންވަރު ދަށްވުމުން ބެލެންސް ކުރުމަށް 3-4-2-1 އަށް ވެސް ވަރަށް ގިނައިން ކުޅުވަން ޖެހެ އެވެ. މިހެންވެ މި މުބާރާތުގައި ވެސް މިއިން ފޯމޭޝަނެއް ބޭނުން ކުރުމަކީ ވަރަށް ގާތް ކަމެކެވެ. އަގުއިރޭ ޓީމާ ހަވާލުވި ފަހުން ވެސް މެކްސިކޯގެ އެންމެ ބޮޑު މައްސަލައަކީ ގޯލްކީޕަރުގެ މައްސަލަ އެވެ. ޓީމުގައި ތިބި ދެ ކީޕަރުން ވެސް ވަރުގަދަ މެޗުތަކުގައި ކުލަބާއި ގައުމީ ޓީމުގައި ވެސް ހަދާ މިސްޓޭކްތައް ގިނަ އެވެ. އުމުރުން 40 އަހަރުގެ ކީޕަރު ގުއިލާމޯ އޮޗޯއާ އަލުން ގައުމީ ޓީމަށް ގެނެސް އޭނާ އަށް ބަރޯސާ ވާން ޖެހެނީ މިހެންވެ އެވެ.

މަގުމަތިން ހިނގާފައިދާއިރު ގައުމީ ޓީމާމެދު މީހުން އުއްމީދުތަކެއް ކުރާކަން އެނގޭ. އަހަރެން ޓީމަށް ނަގާނީ 100 ޕަސެންޓް ފިޓް ކުޅުންތެރިން. އަހަރެންގެ ޓީމުގައި ކޮންމެ މަގާމަކަށް ވެސް އެއް ފެންވަރަކަށް ކުޅެވޭނެ ދެ ކުޅުންތެރިން އެބަތިއްބޭ ބުނެވިދާނެ. އެކަމަކު އަނިޔާގެ މައްސަލަތައް ވެސް މަދެއް ނޫން.