ޖޯޑަން

ޖޯޑަންގެ ގިނަ ކުޅުންތެރިން ކުޅެނީ އަމިއްލަ ގައުމުގަ އެވެ. އަލް ފައިސަލީ އާއި އަލް ހުސައިން އާއި އަލް ވަހްދާ އަކީ އެ ގައުމުގެ އެންމެ ވަރުގަދަ ކުލަބުތަކެވެ. ގޯލްކީޕަރު ޔަޒީދު އަބޫލައިލާ އަކީ ގައުމީ ޓީމަށް 74 މެޗު ކުޅެދީފައިވާ އަލް ހުސައިންގެ ކީޕަރެވެ. ޑިފެންޑަރު ޔަޒާން އަން އަރަބް ކުޅެނީ ދެކުނު ކޮރެޔާގެ އެފްސީ ސޯލް އަށެވެ. އަބްދުﷲ ނާސިބަކީ އިރާގުގެ އަލް އަލް ޒަވްރާގެ ކުޅުންތެރިއެކެވެ. މުހައްމަދު އަބުއަލްނާދީ ކުޅެނީ މެލޭޝިޔާގެ ސެލަންގޯ އަށެވެ. މެދުތެރެއިން މޮޅަށް ކުޅޭ ނޫރު އަލް ރަވާބްދާ އަކީ ވެސް ސެލަންގޯ އަށް ކުޅޭ ތަޖުރިބާކާރު ކުޅުންތެރިއެކެވެ އޭނާ ވަނީ ގައުމީ ޓީމަށް މިހާތަނަށް 66 މެޗު ކުޅެދީފަ އެވެ.

ޓީމުގެ އެންމެ އިސް ފޯވަޑަކީ ކެޕްޓަން މޫސާ އަލް ތާމަރީ އެވެ. ގައުމީ ޓީމަށް 90 މެޗު ކުޅެ 24 ގޯލު ޖަހާފައިވާ ފޯވަޑަކީ ފްރާންސްގެ ރެނޭސްގެ ކުޅުންތެރިއެކެވެ. ސައުދީ އަރަބިއާގެ އަލް ޝަރާބަށް ކުޅޭ ޒުވާން ފޯވަޑް އަލީ އަޒައިޒާ އަކީ އަރަމުން އަންނަ ހުނަރުވެރިއެކެވެ.

ޖޯޑަން އޭޝިޔާގައި ވެސް ކުޅެނީ ވަރަށް ދިފާއީ ކުޅުމެކެވެ. މިހެންވެ ވޯލްޑް ކަޕުގައި މިކަން ބަދަލުވާނެ ކަމަށް ނުފެނެ އެވެ. ޓީމުގެ އެޓޭކްގައި ފުލްބެކުންގެ މާބޮޑު ދައުރެއް ނުފެނެ އެވެ. ޖޯޑަންގެ ކުރީގައި ތިބީ ހަލުވި ކުޅުންތެރިންނެވެ. ފަހަތުން ޖަހާ ދިގު ބޯޅައެއްގައި އެ މީހުންގެ ބޭނުން ކުރަން އުޅުނު މަންޒަރު ކޮލިފައިންގައި ވަނީ ވަރަށް ބޮޑަށް ފެނިގެން ގޮސްފަ އެވެ. އެކަމަކު ވޯލްޑް ކަޕް ގާތްވާއިރު ކޯޗަށް އޮތް އެންމެ ބޮޑު ނުތަނަވަސް ކަމަކީ ގިނަ ކުޅުންތެރިންނަށް ހާނިއްކަވެފައިވުމެވެ.

ކޯޗު: ޖަމާލް ސެއްލާމީ

އުމުރު: 55

ގައުމު: ޖޯޑަން

ޖޯޑަންގެ ކޯޗަކީ އުމުރުން 55 އަހަރުގެ މޮރޮކޯ ރައްޔިތެކެވެ. ޖަމާލް ސެއްލާމީ އެވެ. އޭނާ އަކީ ކުރީގެ މިޑްފީލްޑަރެކެވެ. މޮރޮކޯގެ ގައުމީ ޓީމަށް 38 މެޗު ކުޅެ ދެ ގޯލު ޖެހި އެވެ. ކޯޗުކަން ކުރަން ފެށީ 2011 ވަނަ އަހަރު އެވެ. މޮރޮކޯގެ އޭ ޓީމު ގެންގުޅުނު ނަމަވެސް ޖޯޑަން އަކީ އޭނާ ކޯޗުކޮށްދޭ ފުރަތަމަ ސީނިއާ ގައުމީ ޓީމެވެ. މަގާމާ ހަވާލުވީ 2024 ވަނަ އަހަރު އެވެ. ހުސްވި އަހަރުގެ އަރަބް ކަޕްގެ ފައިނަލަށް ޓީމު ގެންގޮސްދިނުމާއި ވޯލްޑް ކަޕަށް ކޮލިފައިފައި ކޮށްދިނުމުގެ އުފަލުގައި ޖޯޑަންގެ ރަސްގެފާނު ވަނީ އޭނާ އަށް އެ ގައުމުގެ ރަށްވެހިކަން ދީފަ އެވެ.

މިއީ އަހަރުމެންގެ ފުރަތަމަ ވޯލްޑް ކަޕް. މިހެންވީމާ މިކަމާމެދު މުޅި ގައުމު ވެސް އުފާކުރާނެ. އަހަރުމެންނަށް މިފަދަ މުބާރާތްތަކަށް ދާއިރު ލިބޭ އުއްމީދަކީ މޮރޮކޯ ވެސް ވޯލްޑް ކަޕުގައި ރަނގަޅު ހިސާބަކަށް މީގެ ކުރިން ދަތުރު ކޮށްފައިވުން. އެއީ އަހަރުމެންނަށް ވެސް ގިނަ ދުވަހުން ނުކުރެވޭނެ ކަމެއް ނޫން. މި ފަހަރުގެ މުބާރާތަކީ އަހަރުމެން ކުރިއަށް ފިޔަވަޅުތަކެއް އަޅަން ޖެހޭ މުބާރާތެއް. މީގެ ކުރިން ވޯލްޑް ކަޕުގައި ހައިރާން ކުރުވަނިވި ނަތީޖާތައް ނެރެފައި އެބަހުރި. އަހަރުމެން މަސައްކަތް ކުރާނަން. ކާމިޔާބު ދެއްވާ ފަރާތަކީ ﷲ.