ARG·FIFA #1
އާޖެންޓީނާ
ލަޔޮނަލް ސްކަލޯނީ
01ޓީމު ޕްރޮފައިލް
01
ގައުމުގެ ތައާރަފް:
އާބާދީ: 46 މިލިއަން މީހުން
ފުޓްބޯޅައިގެ ރަންމާޒީއެއް ވެރި އާޖެންޓީނާ އަށް ފުޓްބޯޅައިގެ ހުނަރުތައް ލިބުނީ ސްޕޭނާއި އިޓަލީ މީހުންގެ ފަރާތުންނެވެ. ނަމަވެސް އެއީ އެމީހުންގެ މާޒީ އެވެ. ސައިޒުގެ ގޮތުންނާއި އާބާދީގެ ގޮތުން ދެކުނު އެމެރިކާގައި ދެ ވަނަ އަށް އެންމެ ބޮޑު ގައުމުގެ ރަސްމީ ބަހަކީ ސްޕެނިޝް ބަހެވެ. އާޖެންޓީނާގެ މި ނަމަކީ ވެސް އެމީހުން ދިން ނަމެކެވެ. އެއި އެ ގައުމަށް ރިއްސާއި މައިން ނަގަން ދިޔަ ސްޕޭން ބަޔަކު ކިޔާ އުޅުނު އާޖެންޓަމް ނަމާ ގުޅުވައިގެންނެވެ. މިކަމާހުރެ އާޖެންޓީނާ މަޝްހޫރުވީ ރިހީގެ މަރުކަޒުގެ ގޮތުގަ އެވެ. ސްޕޭނުގެ މިހާބޮޑު ނުފޫޒެއް ވެރިވެފައިވިޔަސް އާޖެންޓީނާގެ ކެއުމުގެ މުހިންމު ބާވަތްތައް އަސްލު ގުޅިފައިވަނީ އިޓަލީ އާއި ޖަޕާން މީހުންނާ އެވެ. އާޖެންޓީނާގެ ބޮއެނަސް އައިރިސް އަކީ ދެކުނު އެމެރިކާގެ ޕެރިހެވެ. ގައުމުގެ 98 ޕަސެންޓް މީހުންނަށް ލިޔަންކިޔަން އެނގެ އެވެ.
02
ވޯލްޑް ކަޕަށް ކޮލިފައިވީ ގޮތް:
އާޖެންޓީނާ ވޯލްޑް ކަޕަށް ކޮލިފައިވީ އެންމެ ފަހުގެ ޗެމްޕިއަނުންގެ ހައިސިއްޔަތުންނެއް ނޫނެވެ. ޗެމްޕިއަން ޓީމު ވެސް ކޮލިފައިވާން ޖެހޭތީވެ ދެކުނު އެމެރިކާގެ ކޮލިފައިންގެ އެއްވަނަ ޓީމުގެ ގޮތުގަ އެވެ. ކޮލިފައިންގައި ފަސޭހަ ރާސްތާއެއް ލިބުނު ނަމަވެސް ދެ މެޗަކުން އާޖެންޓީނާ ބަލިވި އެވެ.
03
ފުޓްބޯޅައިގެ ހާލަތު:
އާޖެންޓީނާ އަށް ފުޓްބޯލަ ތައާރަފް ކޮށްދިނީ އިނގިރޭސިންނެވެ. ފުޓްބޯޅަ އަކީ ގައުމީ ކުޅިވަރަށް ނުވި ނަމަވެސް އެންމެ މަގުބޫލު ކުޅިވަރެވެ. އާއްމުކޮށް 90 ޕަސެންޓް މީހުން ކުޅިވަރުގައި ޝާމިލްވެ އުޅެ އެވެ. އެ ގައުމުގެ ލީގަކީ ފަސް ވަނަ އަށް ފީފާއިން ރަސްމީކޮށް ބަލައިގަތް ލީގެވެ. މިއަދު އެއީ ފުޓްބޯޅައިގެ ބޮޑު ބާރެކެވެ. އެމީހުން ވަނީ ފާއިތުވެދިޔަ 56 އަހަރުގެ ތެރޭގައި ވޯލްޑް ކަޕުގެ ފައިނަލްގައި ފަސް ފަހަރު ކުޅެ ތިން ފަހަރު ތަށި ހޯދައިފަ އެވެ. އެއީ 1978 އާއި 1986 އާއި 2022ގަ އެވެ. މަޝްހޫރު ޑިއެގޯ މަރަޑޯނާ އާއި ލަޔޮނަލް މެސީ އަކީ އާޖެންޓީނާގެ ފުޓްބޯޅައިގެ އެންމެ ވަރުގަދަ ދެ ޝަހުސިއްޔަތެވެ.
