އީރާން

ޓީމުގެ އެންމެ އިސް ފޯވަޑަކީ ސަރްދާރު އަޒްމޫން ވަނީ ސިޔާސީ ސަބަބަކާހުރެ ޓީމުން އުނިކޮށްފަ އެވެ. އުމުރުން 32 އަހަރުގެ ގޯލްކީޕަރު އަލީ ރިޒާ ވަނީ ގައުމީ ޓީމަށް 84 މެޗު ކުޅެދީފަ އެވެ. އިހްސާން ހަޖްސާފީ ވަނީ ގައުމީ ޓީމަށް 144 މެޗު ކުޅެދީ ހަ ގޯލު ޖަހައިފަ އެވެ. އުމުރުން 36 އަހަރުވިޔަސް ކޯޗު އެންމެ އިތުބާރު ކުރާ ޑިފެންޑަރަކީ ވެސް އެއީ އެވެ. މެހެދީ ތެރޭމީ އަކީ ޓީމުގެ ކުރި ލީޑްކުރާނެ އަނެއް ކުޅުންތެރިޔާ އެވެ.

މުޅި މުބާރާތުގައި އެންމެ އިސްކޮޅުން ދިގު ސްކޮޑް އޮންނާނީ އިރާނުގަ އެވެ. އެމީހުންގެ އެންމެ ބޮޑު އެޑްވާންޓޭޖަކީ ވެސް މިއީ އެވެ. މަތިން ކުޅޭ ބޯޅަތަކުން ގޯލު ޖެހުމަކީ ކޮލިފައިންގައި ވެސް އިރާނުގެ ވަރަށް ބޮޑު ރޭވުމެކެވެ. އެކަމަކު އާދައިގެ ޓީމުތައް ވެސް އިރާން ކޮޅަށް ގޯލު ޖަހާފައިވާތީވެ ޑިފެންސާ މެދު ކަންބޮޑުވުންތައް ގިނަ އެވެ. އަރުމަތިން ކުޅޭ ކުޅުންތެރިން ދަނޑުގެ ކޮންމެ ދިމާލަކުން ވެސް ހުރަސް ކުރަން އިސްކަންދެ އެވެ.

ކޯޗު: އާމިރު ގަލައޯނީ

އުމުރު: 62

ގައުމު: އިރާން

އާމިރު ގަލަނޯއީ ޓީމާ ހަވާލުވީ 2023 ވަނަ އަހަރު އެވެ. އުމުރުން 62 އަހަރުގެ ކޯޗަކީ އިރާނުގެ ގައުމީ ޓީމަށް 20 މެޗުން އެއް ގޯލު ޖަހާދީފައިވާ ކުރީގެ މިޑްފީލްޑަރެކެވެ. އޭނާ ވަނީ ގައުމީ ޓީމާ ހަވާލުވުމުގެ ކުރިން މެދުއިރުމަތީގައި ގިނަ ކާމިޔާބީތަކެއް ހޯދައިފަ އެވެ. އޭނާގެ ކުލަބު ކެރިއަރަށް ބަލާއިރު 346 މެޗުން މޮޅުވެ، ބަލިވީ 213 މެޗުންނެވެ. ގައުމީ ޓީމުގައި 43 މެޗު ކުޅެފައިވާއިރު 29 މެޗުން މޮޅުވެ 15 މެޗު އެއްވަރު ކުރި އެވެ. ބަލިވީ އެންމެ ހަ މެޗުންނެވެ.

ހަނގުރާމައިގެ ސަބަބުން އަހަރުމެންގެ ކުޅުންތެރިންގެ ކުޅުން މިވަނީ ހުއްޓިފައި. މީގެ ސަބަބުން ފިޓްނަސް ދަށްވެއްޖެ. އަދި ވަރަށް ގިނަ އުނދަގޫތައް ދިމާވެއްޖެ. އަހަރުމެންގެ އުއްމީދަކީ ގްރޫޕް ސްޓޭޖް ފަހަނައަޅައިދިއުން. އަދި ގަދަ 16 އަށް ވެސް ދަތުރު ކުރުން. މި ގްރޫޕުގައި އިރާނާއި ނިއުޒީލޭންޑާއި މިސުރަށް ވެސް އޮތީ ހަމަހަމަ ފުރުސަތެއް.