ބެލްޖިއަމް

ބެލްޖިއަމް ޓީމުގައި މެންޗެސްޓާ ސިޓީގެ ޖެރެމީ ޑޮކޫ އަކީ މުހިންމު ކުޅުންތެރިއެކެވެ. އެންމެ ފަހުގެ ވޯލްޑް ކަޕާއި ޔޫރޯގައި ވެސް ކުޅެފައިވާތީވެ މި ފަހަރުގެ މުބާރާތުގައި އޭނާ މިދަނީ ތަޖުރިބާތަކަކާއިގެންނެވެ. މެންޗެސްޓާ ސިޓީގައި ގަވާއިދުން ކުޅެން ފެށުމުގެ ކުރިން އޭނާ ވަނީ ބެލްޖިއަމްގެ އަންޑަލެކްޓާއި ފްރާންސްގައި ވެސް މޮޅަށް ކުޅެފަ އެވެ.

ގޯލްކީޕަރު ތިބައޫ ކޯޓުއާ ޔޫރަޕުގެ އެންމެ މޮޅު އެއް ގޯލްކީޕަރެވެ. 2014 ވަނަ އަހަރުގެ ވޯލްޑް ކަޕުގެ އެންމެ މޮޅު ކީޕަރު ވެސްމެ އެވެ. ރެއާލް މެޑްރިޑުގައި މޮޅަށް ކުޅެ އޭނާ ހޯދާފައިވާ ތަޖުރިބާ އާއި ކުރިއެރުން ގައުމީ ޓީމުގައި ދައްކަން ގޮވާލާ ބެލްޖިއަމްގެ މީހުން ގިނަ އެވެ.

ކެބިން ޑްބްރޫނޭ އަކީ ޓީމުގެ މައި އިންޖީނެވެ. އިޓަލީގެ ނާޕޮލީ ގައި ދޭތެރެދޭތެރެއިން ފޯމު ކަޓާފައި ހުއްޓަސް ޑެބްރޫނޭ ނުލައި ބެލްޖިއަމް ޓީމު ނެރޭވަރެއް ނުވާނެ އެވެ. މިހާތަނަށް ތިން ވޯލްޑް ކަޕް ކުޅެ ގައުމީ ޓީމަށް 115 މެޗު ކުޅެދީފައިވާ ކުޅުންތެރިޔާ ކުލަބު ލެވެލްގައި ކިތަންމެ ކާމިޔާބީއެއް ހޯދާފައިވިޔަސް ގައުމީ ޖާޒީގައި އަދި އެ ހުރީ ހުސްއަތާ އެވެ.

ބެލްޖިއަމް ޓީމަކީ ވަކިވަކި ކުޅުންތެރިންގެ ހުނަރަށް ބަރޯސާވާ ޓީމެކެވެ. މީގެ އެއް ސަބަބަކީ އަބަދުވެސް ކުޅުންތެރިންގެ ގުޅުން ކުޑަވުމެވެ. ޓީމުގެ ފަހަތާއި ގޯލްކީޕިން ޑިޕާޓްމަންޓް ވަރުގަދަ އެވެ. އަރިމަތިން ކުޅޭ ކުޅުންތެރިން ހަލުވި އެވެ. އެކަމަކު އެންމެ އިސް ފޯވަޑް ލުކާކޫ ހުރީ ފޯމު ކަޓާފަ އެވެ. މެދުތެރެއިން ޑެބްރޫނޭ ފަދަ ކުޅުންތެރިންގެ ޕީކް ހިނގައްޖެ އެވެ. މިހެންވެ ގޯލްޑަން ޖެނެރޭޝަނުގެ ތެރެއަށް ޒުވާނުން ލިޔަސް ބެލްޖިއަމް ޓީމުގައި މާބޮޑު އާރެއް ނެތް ކަމަށް ދެކޭ މީހުން މަދެއް ނޫނެވެ.

ކޯޗު: ރުޑި ގާސިއާ:

އުމުރު:

ގައުމު:

ރުޑިގާސިއާ ގައުމީ ކޯޗުކަމާ ހަވާލުވީ ވޯލްޑް ކަޕް ކޮލިފައިންގެ މެދުތެރެއިންނެވެ. ސައޫދީ އަރަބިއާ އާއި ފްރާންސާއި އިޓަލީގެ ކުލަބުތަކަށް ކުޅެ ހޯދި ތަޖުރިބާ ކޯޗެއްގެ ގޮތުގައި އޭނާ މިހާތަނަށް ދަނީ ރަނގަޅަށް ހިފަމުންނެވެ. ގައުމީ ޓީމާ ހަވާލުވުމުގެ ކުރިން އޭނާ ވަނީ ފްރާންސްގެ ލިލް އާއި މާސޭ އާއި ލިއޯނާއި އިޓަލީގެ ކުލަބުތަކުގައި ވެސް ކާމިޔާބު ހޯދައިފަ އެވެ. ރުޑިގާސިއާ އަކީ ކުޅުންތެރިންނާ ވަރަށް ބޮޑަށް ގުޅިގެން ހަރުކަށި އުސޫލުތައް ދޫކޮށްލައި ވަރަށް ބޮޑަށް މިނިވަން  މާހައުލެއްގައި ކުޅުންތެރިން ގެންގުޅޭ ކޯޗެކެވެ.

އަހަރުމެންނަކީ ކުޑަ ގައުމެއް ނޫން. އަހަރެންނަށް މަޝްހޫރު އަދި މޮޅު ކުޅުންތެރިންނާއެކު މަސައްކަތް ކުރަން ވެސް އުނދަގުލެއް ނޫން. މި ޓީމު މހާރު މިދަނީ އަނެއްކާ ވެސް ބިނާ ކުރަމުން. ފްރާންސް ވޯލްޑް ކަޕް ހޯދަން ލައްކަ ދުވަސް ނެގި. އެހެންވީމާ ބެލްޖިއަމަށް އެކަން ނުވެގެން އަދި މާޔޫސްވާން ޖެހޭ ސަބަބެއްނެތް.