އިންގްލޭންޑް

އިނގިރޭސި ކުޅުންތެރިންގެ ތެރެއިން ކެޕްޓަން ހެރީކޭން އަކީ ގޯލު ޖަހާ މެޝިނެކެވެ. އޭނާ އަށް މަދުވަނީ ބޮޑު މުބާރާތެކެވެ. ވޯލްޑް ކަޕުގެ ރަންބޫޓު ވެސް 2018ގައި ގެންދިޔައީ އޭނާ އެވެ. ކޭންގެ ފަހަތުން ޖޫޑް ބެލިންހަމަކީ އޭނާ ފޯމުގައި ހުރެފިނަމަ އާދަޔާ ހިލާފު މޮޅު ކުޅުންތެރިއެކެވެ.

ގޯލްކީޕަރު ޖޯޑަން ޕިކްފޯޑް ކުރަސް ފާއިތުވެދިޔަ އަށެއްކަ އަހަރު އިނގިރޭސިން ދެ ފަހަރު ޔޫރޯ ކުޅެ ވޯލްޑް ކަޕް ސެމީ ފައިނަލަށް ދިއުމުގައި އެންމެ ބޮޑު ކްރެޑިޓެއް އޮތީ އޭނާ އަށެވެ. މެދުތެރެއިން ޑިކްލަން ރައިސް އަކީ ޔޫރަޕުގައި މިވަގުތު ހުރި އެންމެ މޮޅު އެއް މިޑްފީލްޑަރެވެ. ހާއްސަކޮށް ކޯނަރުތަކާއި ހިލޭ ޖެހުމުގަ އެވެ. ޖޯޑަން ހެންޑަސަން އަކީ ޓީމުގެ ލީޑަރެކެވެ. ބުކަޮ ސަކާ އަކީ ވެސް ހަލުވި ހަނި ދޭތެރެތަކުން ދެމިގަތުމުގައި ހަލުވި ކުޅުންތެރިއެކެވެ.

ޗެލެންޖެއް ނެތް ވޯލްޑް ކޮލިފައިންގައި މުޅިން ވެސް އިނގިރޭސިން ކުޅުނީ 4-2-3-1 ފޯމޭޝަނަށެވެ. މިހެންވެ ޓީމު އޮތީ މި ތައްގަނޑަށް ހޭނިފަ އެވެ. ކީޕަރު ޕިކްފޯޑުން ފެށިގެން ގޮސް އެންމެ ކުރިން ހެރީކޭންއާ ހަމައަށް ޓީމު އޮތ ސެޓް ކޮށްފަ އެވެ. އާސެނަލް އަށް ކޯނަރުތަކުން ފާޑުކިއުން އަމާޒުވި ނަމަވެސް ގައުމީ ޓީމު ބުކަޔޯ ސަކާ އާއި ޑިކްލައިން ރައިސް ނަގާ ހުރަސްތައް ބަރާބަރެވެ. މަތިން ކުޅޭއިރު ޑެޑްބޯލް ސިޓުއޭޝަނަށް ޗެލްސީގެ ކެޕްޓަން ޖޭމްސް ވެސް ރަނގަޅެވެ. ބެންޗުން ވެސް އަރަން ތިބީ އެއް ފެންވަރެއްގެ ކުޅުންތެރިންނެވެ.

ކޯޗު: ތޯމަސް ޓުޗެލް:

އުމުރު: 52

ގައުމު: ޖަރުމަނު

އިނގިރޭސި ކޯޗު ތޯމަސް ޓުޗެލް އަކީ ތަޖުރިބާކާރު އަދި ކާމިޔާބު ކޯޗެކެވެ. ޗެލްސީ އަށް ޗެމްޕިއަންސް ލީގު އެންމެ ފަހުން ހޯދައިދިނީ އޭނާ އެވެ. ފްރާންސްގެ ޕީއެސްޖީ ގޮވައިގެން ޗެމްޕިއަންސް ލީގު ފައިނަލަށް ވެސް ދަތުރު ކުރި އެވެ. ޓުޗެލް އަކީ ޖަރުމަނު މީހެކެވެ. އޭނާއަކީ ވިސްނުންތެރިކަމާއި ޓެކްޓިކަލީ ވެސް ތަފާތު ދައްކާ ކޯޗެކެވެ. އިނގިރޭސި ކޯޗުކަން އޭނާ އަށް ދިނީ އެ ގައުމުގެ ކުޅުންތެރިން ރަނގަޅަށް އެނގިހުރުމާއެކު އޭނާގެ ޓްރެކް ރެކޯޑު ވެސް ރަނގަޅުވުމުންނެވެ.

އަހަރުމެން ވޯލްޑް ކަޕް ކާމިޔާބު ކުރަން އުއްމީދު ކުރަން. އެކަން ނުވާންވީ ސަބަބެއް ނެތް. އަހަރުމެންނަށް ހުރިހާ ވަސީލަތެއް އެބަހުރި. ހަމައެކަނި ކުރަންވީ ކަމަކީ އަހަރުމެން އެކަމަށް ފުރިހަމަ އަށް ތައްޔާރުވުން. އެމެރިކާގެ މާހައުލަށް ހޭނެން އަހަރުމެން ކުރީބައިގައި އުޅުނީ ވެސް މިހެންވެ. އިނގިރޭސި ސީޒަން ތަންކޮޅެއް ދިގުލައި ދިޔަ ނަމަވެސް އަހަރުމެން ހުރިހާ ކުޅުންތެރިން ރަނގަޅު ފިޓްނަސްއެއްގައި ބޭތިއްބޭނެ ކަމާމެދު ޝައްކެއްނެތް.