ކާބޯވޭޑޭ

އާބާދީ: 7 މިލިއަން މީހުން

މި ފަހަރުގެ ވޯލްޑް ކަޕް ބާއްވާ އެއް ސިޓީ ކަމަށްވާ އެމެރިކާގެ ޓެކްސަސްގެ އާބާދީ އަށްވުރެ ކާބޯވޭޑޭގެ ރައްޔިތުންގެ އަދަދު 60 ގުނަ މަދެވެ. 1456 ވަނަ އަހަރާ ހަމައަށް ކާބޯވޭޑޭގައި ބަޔަކު ދިރިނޫޅެ އެވެ. އެތަނުގައި ފަހުން އުޅުނީ ޕޯޗުގަލް މީހުން ކަމަށް ބުނެވެ އެވެ. ކާބޯވޭޑޭ އަކީ 1975 ވަނަ އަހަރު މިނިވަންވި ގައުމެކެވެ. އެއީ އެޓްލާންޓިކް ކަނޑުގައި އެފްރިކާގެ ހުޅަނގަށް ވާގޮތަށް އޮނަން ޖަޒީރާއެކެވެ. އެފްރިކާގެ ގައުމުތަކުގެ ތެރެއިން އެންމެ ޑިމޮކްރަޓިކް އެއް ގައުމެވެ. އެކުވެރި ބަޔަކު އުޅޭ ގައުމެކެވެ. ގައުމުގެ އިގްތިސާދު ބިނާކޮށްފައިވަނީ ފަތުރުވެރިކަމާއި ފޮރިން އިންވެސްޓްމަންޓަށެވެ. ކްރެއޯލޭ ބަހުން ގިނަ ބަޔަކު ވާހަކަ ދެއްކި ނަމަވެސް ކޭޕްވާޑޭގެ ރަސްމީ ބަހަކީ ޕޯޗުގީޒް ބަހެވެ. ގައުމުގެ ގިނަ ބަޔަކު ދިރިއުޅެނީ އެހެން ގައުމުތަކުގަ އެވެ. ސަބަބަކީ ވަޒީފާ އާއި އާމްދަނީ ހޯދުމަށްޓަކަ އެވެ.

ކާބޯވޭޑޭ ވޯލްޑް ކަޕަށް ކޮލިފައިވީ އެފްރިކާގެ ގްރޫޕް ޑީގެ އެއްވަނަ ޓީމުގެ ގޮތުގަ އެވެ. އެއީ މަޝްހޫރު ކެމަރޫނަށްވުރެ ހަތަރު ޕޮއިންޓް ކުރީގައި އޮވެގެންނެވެ. ކުޅުނު 10 މެޗުގެ ތެރެއިން ހަތް މެޗުން މޮޅުވެ ބަލިވީ އެންމެ މެޗަކުންނެވެ. ފައިދާ ގޯލުގެ ގޮތުގައި ކެމްޕޭން ނިންމާލީ އަށް ގޯލާއެކުގަ އެވެ.

ފުޓްބޯޅަ އަކީ ކާބޯވޭޑޭގެ އެންމެ މަގުބޫލު ކުޅިވަރެވެ. ގައުމުގެ ފުޓްބޯޅަ ލީގުތައް ބަހާލާފައިވަނީ 11 ޑިވިޝަނަކަށެވެ. ގަވާއިދުން މުބާރާތްތައް ބާއްވައި އެފްރިކާގެ ރީޖަނަލް މުބާރާތްތަކުގައި ކާބޯވޭޑޭގެ ޓީމުތައް ބައިވެރިވެ އެވެ. އެ ގައުމުގެ އެންމެ ބޮޑު ސްޓޭޑިއަމުގެ ޖާގަ އަކީ 8000 މީހުންނެވެ. އެވްރެޖްކޮށް މިތަނުގައި ކުޅޭ މެޗުތައް ބަލަން ހާހަކާއި ދެހާހާ ދެމެދުގެ އަދަދަކަށް މީހުން ވަދެ އެވެ. ގައުމީ ޓީމު އުފައްދައި ކާބޯވޭޑޭއިން އެންމެ ފުރަތަމަ ކުޅުނު މެޗަކީ 1978 ވަނަ އަހަރު ގިނީއާ ދެކޮޅަ ކުޅުނު މެޗެވެ. އެ ގައުމުގެ ގިނަ ކުޅުންތެރިން ކުޅެނީ އެމެރިކާ އާއި ޕޯޗުގަލް އާއި ތުރުކީ އާއި ބަލްގޭރިޔާ ފަދަ ގައުމުތަކުގަ އެވެ. މިފަހަރުގެ މުބާރާތަކީ ކާބޯވޭޑޭ ކުޅޭ ފުރަތަމަ ވޯލްޑް ކަޕެވެ. އެފްރިކާ ކަޕުގައި މިހާތަނަށް ހަތަރު ފަހަރު ކުޅެ ދެ ފަހަރު ކުއާޓާ ފައިނަލުން ޖާގަ ހޯދި އެވެ. އެއީ 2013 އާއި 2023 ވަނަ އަހަރު އެވެ. މި ކާމިޔާބީތަކުގެ ނަތީޖާ އަކީ އެ ގައުމާ ގުޅިފައިތިބި ޔޫރަޕުގެ ކުޅުންތެރިން ހޮވާލައިގެން ގެނެސް ކާބޯވޭޑޭގެ ގައުމީ ޓީމަށް ކުޅުވުމެވެ.