އޮސްޓްރޭލިޔާ

މިޑްފީލްޑަރު ޖެކްސަން އިރްވިނޭ އަކީ ޓީމުގެ މެދުތެރޭގެ މައި ތަނބެވެ. ވޯލްޑް ކަޕުގެ ކުރިން ފައިތިލައިގެ އޮޕަރޭޝަނަށް ކުރި ނަމަވެސް ކޯޗު އޭނާ ޓީމަށް ނެގީ ވަރަށް ބޮޑަށް އިތުބާރު ކުރާތީ އެވެ. ތިން ފަހަރު ވޯލްޑް ކަޕް ކުޅެފައިވާ ގޯލްކީޕަރު މަތިއު ރަޔަން އަކީ ގައުމީ ޓީމުގެ ކެޕްޓަންކަން އެންމެ ގިނަ ދުވަހު ކޮށްފައިވާ ކުޅުންތެރިޔާ އެވެ. ސްޕޭނުގެ ލެވަންޓޭގެ ކީޕަރު ވަނީ ގައުމީ ޓީމަށް 103 މެޗު ކުޅެދީފަ އެވެ. މީގެ އިތުރުން ވަޓްފޯޑް ފޯވަޑް ނެސްޓްރޯއި އިރަންކުންޑާ އާއި އެމެރިކާގައި ކުޅޭ ހައެއްކަ ކުޅުންތެރިން ތިބުމަކީ ވެސް ކޯޗަށް އޮތް ހިތްހަމަ ޖެހުމެކެވެ.

ކޮންމެ ބަޔަކު ލައިގެން، ކޮންމެ ފޯމޭޝަނަކަށް ކުޅުނަސް އޮސްޓްރޭލިޔާގެ އެންމެ އިސް ވިސްނުމަކީ ދިފާއު ކުރުމެވެ. ފަހަތަށް ވަރުގަދަ ޑިފެންޑަރުން ލައިގެން މެދުތެރޭގައި ވެސް ފިޒިކަލީ ވަރުގަދަ ކުޅުންތެރިން ބައިތިއްބަން ކޯޗު އިސްކަންދެނީ ގޯލު ޖެހުމުގައި ބައި ދަށްކަމުންނެވެ. މިހެންވެ ކުރިއަށް ކުޅުވާނެ ފޯވަޑަކު ނެގުން ވެސް ކޯޗަށް ވަނީ ދަތިވެފަ އެވެ.

ކޯޗު: ޓޯނީ ޕޮޕޮވިޗް:

އުމުރު: 52

ގައުމު: އޮސްޓްރޭލިޔާ

އޮސްޓްރޭލިޔާގެ ކޯޗަކީ އެ ގައުމުގެ ގައުމީ ޓީމުގެ ކުރީގެ ޑިފެންޑަރު ޓޯނީ ޕޮޕޮވިޗެވެ. ގައުމީ ޓީމަށް 58 މެޗުން އަށް ގޯލު ޖެހި އުމުރުން 52 އަހަރުގެ ކޯޗު ގައުމީ ޓީމާ ހަވާލުވީ 2024ގަ އެވެ. އޭނާގެ ކޯޗުކަމުގައި މިހާތަނަށް ރަނގަޅު ނަތިޖާތަކެއް ނެރެމުން އަންނައިރު ޕޮޕޮވިޗް ވެފައިވަނީ އޮސްޓްރޭލިޔާގެ ކުލަބުތަކުގައި ކާމިޔާބު ކޯޗަކަށެވެ. އޮސްޓްރޭލިޔާގެ އެންމެ މޮޅު ކޯޗުކަން އޭނާ ވަނީ ތިން ފަހަރު ހޯދައިފަ އެވެ. އަދި އޭނާ ވަނީ އޭއެފްސީގެ އެންމެ މޮޅު ކޯޗުގެ މަގާމު ވެސް 2024 ވަނަ އަހަރު ހޯފައިފަ އެވެ. ކޯޗު ޕޮޕޮވިޗް ދެ ކުދިންނަކީ ވެސް ފުޓްބޯޅަ ކުޅުންތެރިންނެވެ.

އަހަރުމެން މިވަނީ ކޮލިފައިވެފައި. އެއީ ވަރަށް ބޮޑު ކާމިޔާބީ އެއް. ޔޫރަޕުގައި ކުޅޭ ކުޅުންތެރިން ހަފުތާއަކު ދެ މެޗު ކުޅެފައި ގައުމީ ޓީމަށް އަންނައިރު އިންޖަރީ ވުމުގެ ފުރުސަތު ބޮޑު. އަހަރުމެން ބޮޑު ސްކޮޑެއް އެކުލަވާލީ ވެސް މިހެންވެ. ވޯލްޑް ކަޕަށް ދާން ޖެހޭނީ އެންމެ ފުރިހަމަ ކުޅުންތެރިން.