ކްރިސްޓިއާނޯ ރޮނާލްޑޯ

ކްރިސްޓިއާނޯ ރޮނާލްޑޯ

އަލް ނަސްރު, ސައުދި އަރަބިއްޔާ

އުފަން ދުވަސް: 5 ފެބްރުއަރީ 1985

ދުނިޔޭގައި މިވަގުތު ހުރި އެންމެ މޮޅޫ އެއް ފުޓްބޯޅަ ކުޅުންތެރިޔާގެ ގޮތުގައި ގިނަބަޔަކު ގަބޫލުކުރާ ޕޯޗުގަލްގެ ކްރިސްޓިއާނޯ ރޮނާލްޑޯ އެ ގައުމުގެ ގައުމީ ޓީމަށް ކުޅެން ފަށާފައިވަނީ 2003 ވަނަ އަހަރު އެވެ.

ޕޯޗުގަލްގެ ހުރިހާ އުމުރު ފުރާއަކަށް ކުޅެފައިވާ ރޮނާލްޑޯ ވަނީ ސީނިއާ ގައުމީ ޓީމަށް މިހާތަނަށް ކުޅެދިން 226 މެޗުގައި 143 ލަނޑު ޖަހާ ގައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާގެ ރެކޯޑް ހޯދާފަ އެވެ. ކުރިން މި ރެކޯޑް އޮންނަނީ އިރާނުގެ އަލީ ދާއީ އަތުގަ އެވެ.

ޕޯޗުގަލްގެ ސްޕޯޓިން ޓީމުން ސީނިއާ ކެރިއަރ ފފެށި ރޮނާލްޑޯ ދުނިޔޭގެ ސަމާލުކަމަށް އައިސްފައިވަނީ 2003 ވަނަ އަހަރު މެންޗެސްޓަރ ޔުނައިޓެޑާއި ގުޅުނު ހިސާބުންނެވެ. އަދި އެ ކްލަބާއި ގުޅި އޭނާ ވަނީ ގިނަ ކާމިޔާބީތަކެއް ހާސިލުކޮށްފަ އެވެ.

އުމުރުން 41 އަހަރުގެ ރޮނާލްޑޯ ވަނީ ފުޓްބޯޅައިގައި ވޯލްޑްކަޕްގެ ޓްރޮފީ ފިޔަވާ އެހެން ހުރިހާ ޝަރަފެއް ހޯދާފަ އެވެ. އޭގެ ތެރޭގައި ބެލޮންޑިއޯ އެވޯޑް ފަސް ފަހަރު, ފީފާގެ މޮލު ކުޅުންތެރިޔާގެ މަގާމު ފަސް ފަހަރު, ޕްރިމިއާ ލިގު, ޗެމްޕިއަންސް ލީގު, ފީފާ ކްލަބް ވޯލްޑްކަޕް, ޔޫއެފާ ސުޕަރ ކަޕް, ސެރިއާ, ޔޫއެފާ ނޭޝަންސް ލީގު އަދި ޔޫރޯ 2016 ގެ ޗެމްޕިއަންކަން ހޯދުމުގެ އިތުރުން އިންޑިވިޖުއަލް ގިނަ އެވޯޑްތަކެއް ހިމެނެ އެވެ.

މިހާތަނަށް 1300 އަށްވުރެ ގިނަ މެޗު ކުޅެފައިވާ ރޮނާލްޑޯ ވަނީ 970 ލަނޑު ޖަހާފަ އެވެ. އެހެންކަމުން ސައުދި އަރަބިއްޔާގެ އަލް ނަސްރަށް ކުޅެމުންދާ ރޮނާލްޑޯ އަށް 1000 ލަނޑު ޖެހުމުގެ ޝަރަފު ހޯދުމަކީ ދުރުގައި އޮތް ކަމެއް ނޫނެވެ.

ފުޓްބޯޅަ ކުޅުންތެރިއެއްގެ ގޮތުގައި ފުރަތަމަ ފަހަރަށް ބިލިއަނަރަކަށްވި އެތްލީޓުގެ ގޮތުގައި ފޯބްސް އިން ފާހަގަކޮށްފައިވާ ރޮނާލްޑޯ ވަނީ އޭނާ މިހާތަނަށް ކުޅެފައިވާ ބޮޑު 11 މުބާރާތުގައި ލަނޑު ޖަހާފަ އެވެ. އުމުރުން 41 އަހަރު ވެފައިވީ ނަމަވެސް ފިޓްނަސް ހިފެހެއްޓުމަށްޓަކައި ދަނޑުން ބޭރުގައި ރޮނާލްޑޯ އަކީ ނަމޫނާ ދައްކާ އެތްލީޓެކެވެ.