ފުޓުބޯޅައިގެ ޢީދުގައި ދިވެހިން ޝާމިލުކޮށްދިނީ ޕީއެސްއެމް: ނައިބު ރައީސް

ނިމެމުން މިދާ ފުޓުބޯޅައިގެ ބޮޑު ޢީދު، ފީފާ ވޯލްޑް ކަޕުގެ ފޯރިން ދިވެހިން މަހުރޫމުވިޔަ ނުދީ، މި ޢީދުގައި ދިވެހިން ޝާމިލުކޮށްދިނީ ޕަބްލިކް ސާވިސް މީޑިއާ (ޕީއެސްއެމް) އިން ކަމަށާއި، މިއީ ޝުކުރު ހައްގު މަސައްކަތެއްކަމަށް، ރައީސުލްޖުމްހޫރިއްޔާގެ ނައިބު، އަލްއުސްތާޛް ޙުސެއިން މުޙައްމަދު ލަޠީފް ވިދާޅުވެއްޖެއެވެ.

ޕީއެސްއެމް ވޯލްޑް ކަޕް ކަވަރޭޖް 2026ގައި ހަރަކާތްތެރިވި ޕްރެޒެންޓަރުންނާއި އެނަލިސްޓުން އަދި ކޮމެންޓްރޭޓަރުންގެ އަގުވަޒަންކުރުމުގެ ގޮތުން ޕީއެސްއެމް ޓީވީ ބިލްޑިންގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައި ނައިބުރައީސް ވަނީ، މެޗުތަކަށް ޙާއްސަކޮށް ޕީއެސްއެމް އިން ގެނެސްދޭ ޝޯވތައް މެދުވެރިކޮށް، މުހިންމު އައު މައުލޫމާތުތަކެއް އެމަނިކުފާނަށާއި ދިވެހި ރައްޔިތުންނަށްވެސް އެނގިގެންދާ ކަމަށެވެ.

ނައިބުރައީސް ވަނީ، މި މަސައްކަތަކީ ޕްރެޒެންޓަރުންނާއި އެނަލިސްޓުން ވަރަށް ގިނަ، ބުރަ މަސައްކަތްތަކެއް ކޮށްގެން ރައްޔިތުންނާ ހަމައަށް ފޯރުކޮށްދޭ މައުލޫމާތުތަކެއްކަން ފާހަގަކުރައްވާފައެވެ. އެހެންކަމުން، ދިވެހިންނާ ހަމައަށް ޕީއެސްއެމްއިން ގެނެސްދިން ކަވަރޭޖުގައި އެންމެ މުހިންމު ހިއްސާއެއް އަދާކުރި ބަޔަކީ ޕްރެޒެންޓަރުންނާއި އެނަލިސްޓުންކަން އެމަނިކުފާނުގެ ވާހަކަފުޅުގައި ފާޙަގަކުރެއްވިއެވެ.

ޕީއެސްއެމްއިން މިފަހަރުގެ މުބާރާތް ދިވެހިންނާ ހަމައަށް ވީހާވެސް ފުރިހަމައަށް ގެނެސްދިނުމަށް ކުރި މަސައްކަތުގައި، އައު ކަންތައްތަކާއި، ހުރިހާ އުމުރެއްގެ، ހުރިހާ ދިވެހިންނަށް މި ޢީދުގައި ބައިވެރިވޭނެ މަގު ފަހިކޮށްދިނުމަށް ޙާއްސަ އިސްކަމެއް ދީފައިވެއެވެ.

އެގޮތުން އެންމެ ޙާއްސަ ކަމެއްގެ ގޮތުގައި ފާހަގަކުރެވެނީ މުޅިން އަލަށް، ދިވެހިރާއްޖޭގެ އަޑުން މި މުބާރާތުގެ މެޗުތަކުގެ ލައިވް ކޮމެންޓްރީ ދިވެހި ބަހުން ގެނެސްދިނުމެވެ. މިކަން ވެގެންދިޔައީ، ލޮލުގެ ފެނުމުން މަޙްރޫމްވެފައިވާ ފަރާތްތަކަށް ވެސް މި ޢީދުގެ އުފާ ލިބިގަތުމުގައި މުހިންމު ހިއްސާއަކަށެވެ.

މިކަމަށް ރިޢާޔަތްކުރައްވައި ނައިބުރައީސް ވަނީ، މިގޮތަށް، މިހާ ފުރިހަމައަށް، ހުރިހާ ގޮތަކަށް ވިސްނައިގެން ކަވަރޭޖް ގެނެސްދިނުމަށް ޕީއެސްއެމް އިން ކުރި މަސައްކަތަކީ ޝުކުރާއި ތައުރީފު ހައްގު މަސައްކަތެއްކަން ފާހަގަކުރައްވާފައެވެ.

ކޮންމެ ހަތަރު އަހަރަކުން އެއް އަހަރު ކުޅޭ ދުނިޔޭގެ އެންމެ ބޮޑު އެއް ހަރަކާތް ކަމުގައިވާ ފީފާ ވޯލްޑް ކަޕުގެ މި އަހަރުގެ މުބާރާތް ދިވެހިންނާ ހަމައަށް ގެނެސްދިނުމަށް ޕީއެސްއެމްއިން ކުރި މަސައްކަތުގައި ގެނެސްދިން މެޗު ކަވަރޭޖްތަކުގައި ހަތް ޕްރެޒެންޓަރުން ބައިވެރިވިއެވެ. އަދި އެނަލިސްޓުންގެ ގޮތުގައި 11 ބޭފުޅަކު ފެނިގެންދިޔައެވެ.

މި ފަރާތްތަކުގެ އަގުވަޒަންކުރުމަށް ބޭއްވި މި ޙާއްސަ ރަސްމިއްޔާތުގައި، އެ ފަރާތްތަކަށް ވަނީ ޙާއްސަ ހަނދާނީ ފިލައެއް އަރުވާފައެވެ. މި ފަރާތްތަކަށް ހަނދާނީ ފިލާ ހަވާލުކޮށްދެއްވީ ނައިބުރައީސް އެވެ.