ސްޕެއިން ޓީމުގައި އަދިވެސް ރަނގަޅު ކުރެވޭނެ ކަންތައްތައް އެބަހުރި: ސްޕެއިން ކޯޗު

ފީފާ ވޯލްޑް ކަޕް ފުޓްބޯޅަ މުބާރާތުގައި ވާދަކުރާ ސްޕެއިންގެ ޓީމުގައި ރަނގަޅު ކުރަންޖެހޭ ކަންތައްތައް އެބަހުރިކަމަށް ސްޕެއިން ޓީމުގެ ކޯޗު ލުއިސް ޑެ ލަ ފުއެންޓޭ ބުނެފިއެވެ.

ޑެ ލަ ފުއެންޓޭ މިހެން ބުނީ 32 ޓީމުގެ ބުރުގައި އޮސްޓްރިއާ އާއި ބައްދަލުކުރި މެޗު 3 ލަނޑު ސުން ލަނޑުން ކާމިޔާބު ކުރުމަށްފަހު ނޫސްވެރިންނާ ވާހަކަ ދައްކަމުންނެވެ. ޑެ ލަ ފުއެންޓޭ ބުނީ ސްޕެއިން ޓީމުގެ ހުރިހާ ދިމާލެއް ހަރުދަނާ ކުރަން ޖެހޭ ކަމަށާއި، ބުނީ އޭނާގެ ޓީމު އެންމެ މަތީ އުސްމިނަށް ނާރާ ކަމަށާއި އެކަން ހާސިލް ކުރުމަށްޓަކައި ގިނަ މަސައްކަތް ތަކެއް ނުރަން ޖެހޭ ކަމަށެވެ. އެގޮތުން އެންމެ ބޮޑު އެއް ސަބަބަކީ ޓީމު އެންމެ މަތީ ހަރުފަތަށް އަދި ދެވިފައިނުވާތީ ކަމަށެވެ. ޑެ ލަ ފުއެންޓޭ ބުނީ އެޓީމުން ރަނގަޅު ކުރަންޖެހޭ ކަންތައްތަކެއް އެބަހުރި ކަމަށެވެ. އަދި ކުޅުންވެސް ރަނގަޅު ކުރަން ޖެހޭ ކަމަަށް ސްޕެއިން ކޯޗު ބުންޏެވެ.

ޑެ ލަ ފުއެންޓޭ ބުނީ ކޮންމެ މެޗެއްވެސް ތަފާތު ވާނެކަމަށެވެ. އަދި ކޮންމެ މެޗެއް އެހާމެ އުނދަގޫ ކަމަށްވެސް އޭނާ ބުންޏެވެ. ބައެއް ފަހަރު އެއް މެޗަށް ވުރެ އަނެއް މެޗު ފަސޭހަ ކަމަށް ފެނުނު ނަމަވެސް އެއީ އިދިކޮޅު ޓީމު ކަންކަން ފަސޭހަ ކޮށްދީންގެން ނޫން ކަމަށާއި އޭގެ ބަދަލުގައި ޓީމު ރަނގަޅަށް ކުޅުމުން ކަމަށް ޑެ ލަ ފުއެންޓޭ ބުންޏެވެ. އޭނާ ބުނީ މިއަދު އޭނާ އުފާންވާންޖެހޭ ގިނަ ސަބަބު ތަކެއް އެބަހުރި ކަމަށާއި މިގޮތުން އެންމެ ފުރަތަމަ ކަމަކީ މިމެޗުން މޮޅުވެ ދެން އޮތް ބުރުން ޖާގަ ހޯދުން ކަމަށެވެ. އަދި ހަމައެއާއެކު އެންމެ ގިނައިރު ބައިކޮޅަށް ލަނޑެއް ވަނަ ނުދީ ކީޕަރ އުނާއި ސިމޯން ވޯލްޑް ކަޕްގެ އާ ރިކޯޑެއް ހެދުންވެސް މިއީ އޭނާ އުފާކުރާ ކަމެއް ކަމަށެވެ.

މެޗަށްފަހު ވާހަކަ ދައްކަމުން އޮސްޓްރިއާގެ ކޯޗު ރާލްފް ރަންގްނިކް ވަނީ ސްޕެއިން ޓީމަށް ތައުރީފްކޮށް ވަރަށް ބޮޑަށް ވާހަކަ ދައްކާފައެވެ. އޭނާ ބުނީ ސްޕެއިންގެ ފަރާތުން ފެނިގެންދިޔައީ އާދަޔާއި ހިލާފު މޮޅު ކުޅުމެއް ކަމަށާއި މިއީ މިމުބާރާތުގައި އޭނާއަށް ފެނިގެންދިޔަ އެންމެ މޮޅު ކުޅުން ކަމަށެވެ. އަދި މިމުބާރާތް އެޓީމުން ކާމިޔާބު ކުރިއަސް އޭނާއަށް ހައިރާންކަން ލިބިގެން ނުދާނެކަމަށެވެ. މިމެޗުގައި އޮސްޓްރިއާއަށް ސްޕެއިންގެ ގޯލަށް އަމާޒުކޮށް އެންމެ ހަމަލައެއްވެސް ފޮނުވާލެވިފައެއް ނުވެއެވެ.